یونیسکو کی خصوصی کمیٹی نے فلسطینی اتھارٹی کی اُس درخواست کو قبول کر لیا ہے، جس کے تحت کہا گیا تھا کہ بیت اللحم کے چرچ آف نیٹیویٹی (Church of the Nativity) کی قدیمی تعمیر کو کئی قسم کے خطرات لاحق ہیں لہذا اسے عالمی ورثہ قرار دیا جائے۔ فلسطینی اتھارٹی کی اس درخواست کو امریکا اور اسرائیل نے سیاست اور ثقافت کا مرکب قرار دیا ہے۔ اس منظوری کو فلسطین میں انتہائی خوشدلی سے قبول کیا گیا ہے۔

فلسطینی اتھارٹی نے اپنی درخواست میں اس چرچ کو عالمی نوعیت کا مقام قرار دیتے ہوئے یونیسکو کی خصوصی توجہ طلب کی تھی۔ فلسطینی اتھارٹی نے اپنی درخواست میں واضح کیا کہ سن 1967 میں اس علاقے پر اسرائیلی قبضے کے بعد کی صورت حال میں اس چرچ کو تواتر سے مرمت اور تزئین نو کی ضرورت ہے اور اسرائیلی قبضے کی وجہ سے تعمیر اور مرمت میں مشکلات حائل ہیں۔

روس کے مشہور مالیاتی اور بندرگاہی شہر سینٹ پیٹرز برگ میں یونیسکو کی اکیس رکنی کمیٹی کے اجلاس میں ووٹنگ کے ذریعے بیت اللحم کے چرچ کو عالمی ورثے کا حصہ قرار دیا گیا۔ فلسطینیوں کی ترجمان حنان اشراوی کا کہنا ہے کہ یونیسکو کی جانب سے اس چرچ کو عالمی ورثہ قرار دینے سے یقینی طور پر اس مقام پر فلسطین کی اتھارٹی تسلیم کیے جانے کے مترادف ہے۔ اس چرچ میں یسوع مسیح کی ولادت کے مقام کو دیکھنے دنیا بھر سے ہر سال تقریباً بیس لاکھ زائرین بیت اللحم پہنچتے ہیں۔ اس چرچ کی ابتدائی تعمیر پندرہ سو برس قبل ہوئی تھی۔

دوسری جانب اسرائیل نے اس منظوری پر افسوس کا اظہار کیا ہے۔ اسرائیل کی وزارت خارجہ کی ترجمان ایلانا سٹائن (Ilana Stein) نے اپنی حکومت کا رد عمل ظاہر کرتے ہوئے کہا کہ اس فیصلے نے یونیسکو ادارے کو نامعقولیت کے تھیئٹر میں تبدیل کر دیا ہے۔ درخواست کی منظوری کی مخالفت امریکا کی جانب سے بھی سامنے آئی تھی۔ یہ بھی اہم ہے کہ امریکا اور اسرائیل دونوں ہی یونیسکو کی اکیس رکنی کمیٹی کے رکن نہیں ہیں۔ یونیسکو میں امریکا کے سفیر ڈیوڈ کیلیون (David Killion) نے اس منظوری پر مایوسی کا اظہار کیا ہے۔

فلسطینی درخواست کی مخالفت اس چرچ کے تین نگران گریک آرتھوڈکس چرچ، آرمینیائی چرچ اور رومن کیتھولک بھی کر رہے تھے۔ ان کا کہنا ہے کہ وہ عثمانی خلافت کے دور کے معاہدے کے تسلسل کے خواہاں ہیں۔ ان مسیحی عقائد کا یہ بھی کہنا ہے کہ اگر یونیسکو میں درخواست منظور ہو گئی تو یہ نگرانی کے توازن کو خراب کر سکتا ہے۔

تجزیہ کاروں کے خیال میں بیت اللحم میں واقع مسیحی و دوسرے مذاہب کے زائرین کے مقبول مقام چرچ آف نیٹیویٹی کی منظوری اصل میں فلسطینی اتھارٹی کی اس خواہش کا حصہ ہے جس کے تحت وہ فلسطین کی ریاست کے لیے بین الاقوامی رائے ہموار کرتے ہوئے اس کی حیثیت کو تسلیم کروانا چاہتی ہے۔ اسرائیل اور فلسطین کے درمیان دو ریاستی تصور پر مبنی مذاکرات تعطل کا شکار ہیں۔ گزشتہ سال اکتوبر میں یونیسکو نے فلسطین اتھارٹی کو ادارے کا رکن بنایا تھا۔

ah/aba (AP)