یمنی دارالحکومت صنعاء میں قبائلی سرداروں اور سرکاری فوجوں کے درمیان جاری لڑائی کے تیسرے روز قبائلی سردار شیخ صادق الاحمر کے حامیوں نے بعض سرکاری عمارات پر قبضہ کرلیا ہے۔ خبر رساں ادارے اے ایف پی کے مطابق قبضہ کی گئی عمارتوں میں یمن کی قومی ایئر لائن یمنیا کی عمارت بھی شامل ہے۔ خبر رساں ادارے نے عینی شاہدین اور ایک یمنی اعلیٰ اہلکار کے حوالے سے بتایا ہے کہ مخالفین وزارت داخلہ کی عمارت پر قبضہ کرنے کی کوشش کر رہے ہیں۔

برطانیہ کے دورے پر پہنچے امریکی صدر باراک اوباما نے ایک بار پھر مطالبہ کیا ہے کہ صدر علی عبداللہ صالح اقتدار سے علیحدہ ہوجائیں۔ برطانوی وزیراعظم ڈیوڈ کیمرون کے ساتھ لندن میں ایک مشترکہ پریس کانفرنس سے خطاب کرتے ہوئے باراک اوباما کا کہنا تھا: ’’ہم صدر صالح سے مطالبہ کرتے ہیں کہ وہ انتقال اقتدار سے متعلق اپنے وعدے پر عمل کریں۔‘‘

قبل ازیں اے ایف پی نے یمن کے طبی ذرائع کے حوالے سے بتایا تھا کہ منگل کے روز تک لڑائی میں 38 افراد ہلاک ہوئے تھے۔ ہلاک ہونے والوں میں قبائلی سردار صادق الاحمر کے 24 حامی ہیں، جن میں تین اہم قبائلی شخصیات بھی شامل ہیں۔ ہسپتال ذرائع کے مطابق درجنوں دیگر افراد زخمی بھی ہیں۔ دوسری طرف یمن کی وزارت دفاع کی طرف سے اپنی ویب سائٹ پر بتایا گیا ہے کہ اس لڑائی میں 14 فوجی ہلاک ہوئے، جبکہ دو لاپتہ ہیں۔

اطلاعات کے مطابق اس لڑائی کے دوران ہر طرح کے ہتھیار استعمال کیے گئے۔ اطلاعات کے مطابق منگل کے روز زیادہ تر لڑائی شیخ صادق الاحمر کی رہائش گاہ اور وزارت داخلہ کی عمارات کے آس پاس ہوتی رہی۔

منگل کے روز یمن کی ہمسایہ خلیجی ریاستوں نے اس لڑائی کے فوری خاتمے کا مطالبہ کیا۔ خلیجی تعاون کونسل کے سیکرٹری جنرل عبدالطیف الزیانی کے مطابق: ’’صنعاء میں دو دن سے جاری لڑائی گلف تعاون کونسل کے لیے تشویش کا باعث ہے، ہمیں خدشہ ہے کہ یہ لڑائی مزید پھیل سکتی ہے۔‘‘

عبدالطیف الزیانی یمن میں قیام امن کے لیے مجوزہ منصوبے کو پایہ تکمیل تک پہنچانے کے لیے بھی کوشاں ہیں۔ اس منصوبے میں ایک طرف تو حکومت مخالفین کی طرف سے اپنی کارروائیاں روکنے جبکہ دوسری طرف صدر علی عبداللہ صالح کو 30 دن کے اندر اقتدار سے علیحدہ ہونے کی تجویز دی گئی ہے۔

شیخ صادق الاحمر یمن کی 'حاشد ٹرائبل کنفیڈریشن‘ کے سربراہ ہیں۔ انہیں صدر علی عبداللہ صالح کا ایک اہم حامی تصور کیا جاتا تھا، تاہم انہوں نے مارچ میں صدر صالح کا ساتھ چھوڑ کر حکومت مخالفین کی مدد کرنے کا اعلان کیا تھا۔

رپورٹ: افسر اعوان

ادارت: عاطف بلوچ