صدر صالح کی اپنے سابق حلیفوں یعنی جنرل علی محسن اور احمر خاندان کے ساتھ کھینچا تانی نے ان کے تینتیس سالہ اقتدار کے خاتمے کے لیے گزشتہ کئی ماہ سے جاری مقبول مظاہروں کی اہمیت کو ماند کر دیا ہے۔ سیاسی تنازعے کی وجہ سے حکومت کی یمن کے بیشتر حصوں پر گرفت کمزور پڑتی جا رہی ہے اور ملک کے شمالی علاقوں میں باغیوں، جنوب میں علیحدگی پسندوں اور القاعدہ کے عسکریت پسندوں نے سر اٹھانا شروع کر دیا ہے۔

سفارت کاری کی کوششوں میں شامل ایک مغربی سفارت کار نے کہا، ’’ہمارا یہ خیال ہوتا ہے کہ سیاسی معاہدہ بس ہونے ہی والا ہے اور ایک بار پھر یہ موقع ہاتھ سے نکل جاتا ہے۔‘‘

صالح کی برسر اقتدار جماعت میں بھی صبر کا پیمانہ لبریز ہوتا جا رہا ہے۔ جماعت کے ایک رہنما کا کہنا ہے، ’’اگر ہم مستقبل میں ایک جماعت کے طور پر قائم رہنا چاہتے ہیں تو ہر ممکن جلد کسی سیاسی معاہدے پر دستخط کرنا ہمارے مفاد میں ہے۔‘‘

یمن کی اہم کاروباری شخصیات نے بھی سیاست دانوں پر معاہدہ کرنے کے لیے زور دیا ہے مگر صدر صالح کے کانوں پر جوں تک نہیں رینگ رہی۔ احمر خاندان اور جنرل علی محسن نے رواں برس کے اوائل میں مختلف وجوہات کی بناء پر صدر صالح سے علیحدگی اختیار کر لی تھی تاہم ان کی صالح کے اقتدار سے علیحدگی کا مطالبہ کرنے والے نوجوان مظاہرین سے کوئی وابستگی نہیں۔

بیرونی طاقتوں کو خدشہ ہے کہ یمن میں جاری افراتفری سے القاعدہ کی یمن شاخ کے ہاتھ مضبوط ہو رہے ہیں۔ ملک میں جاری تشدد کے باعث لاکھوں افراد بے گھر ہو چکے ہیں اور ڈر ہے کہ یہ بحران کہیں پھیلتے پھیلتے سعودی عرب اور دیگر خلیجی ممالک کو اپنی لپیٹ میں نہ لے لے۔

صدر صالح قاتلانہ حملے میں زخمی ہونے کے بعد علاج کرانے کی غرض سے سعودی عرب چلے گئے تھے جہاں سے وہ تین ماہ بعد واپس لوٹے ہیں۔

ایک مغربی مذاکرات کار نے خبر رساں ادارے روئٹرز کو بتایا کہ بات صرف ایک شخص پر آ کر رکتی ہے جو اقتدار چھوڑنے کو تیار نہیں۔ انہوں نے کہا، ’’صالح کے خاندان کو اپنے مستقبل اور زندگیوں کی فکر دامن گیر ہے۔ وہ ایسے یمن سے ناواقف ہیں جو ان کے زیر کنٹرول نہ ہو۔ اسی لیے وہ کسی بھی قسم کے معاہدے کے خلاف ہیں۔‘‘

تجزیہ کاروں کا یہ بھی کہنا ہے کہ مغربی طاقتیں صالح کو اقتدار پر جمے رہنے کی حوصلہ افزائی کر رہی ہیں۔ قطر میں جارج ٹاؤن یونیورسٹی کی شاخ کے خلیجی امور سے متعلق ماہر Gerd Nonneman کا کہنا ہے کہ صالح کے بیٹے اور بھتیجے کے ساتھ مغرب کے انسداد دہشت گردی تعاون کا سلسلہ روکنا ہو گا۔ انہوں نے کہا، ’’امریکہ کبھی کبھار صالح پر اپنے حریفوں کے ساتھ سیاسی معاہدہ کرنے کے بارے میں زور دے دیتا ہے مگر اس کے یمنی حکومت کے ساتھ القاعدہ کے خلاف انسداد دہشت گردی تعاون کو دیکھتے ہوئے صدر صالح کے خاندان میں یہ سوچ زور پکڑتی ہے کہ اقتدار پر قبضہ چھوڑنے کی کیا ضرورت ہے کیونکہ بین الاقوامی برادری ہمیں زبردستی بے دخل نہیں کرنا چاہتی۔‘‘

یمن کے بیشتر عوام اس بات پر مایوس ہوتے جا رہے ہیں کہ جمہوریت کے حق میں ان کی تحریک صدر، فوج اور قبائلی اشرافیہ کے مابین کھینچا تانی تلے دب گئی ہے۔

اس بات کا بھی امکان ہے کہ جنرل علی اور احمر ایک دن صدر صالح کے ساتھ اتحاد کر لیں اور عوام کی محنت پر پانی پھر جائے۔

رپورٹ: حماد کیانی

ادارت: عابد حسین