یوروگوائے کے کھلاڑی نے اٹلی کے کھلاڑی کو دانت سے کاٹ لیا
25 جون 2014![](https://static.dw.com/image/17735845_800.webp)
فٹ بال کی انٹرنیشنل فیڈریشن فیفا نے یوروگوائے کے کھلاڑی لوئس سواریز کی طرف سے اٹلی کے دفاعی کھلاڑی جورجیو چیلینی کو مبینہ طور پر کاٹنے کے الزام کا سرکاری طور پر نوٹس لیتے ہوئے ضابطے کی کارروائی شروع کر دی ہے۔
اس کارروائی کے تحت یوروگوائے کے بہترین جارحانہ کھلاڑی سواریز کو معطل کیا جا سکتا ہے۔ سواریز کو الزام ثابت ہونے کی صورت میں عالمی کپ سے باہر ہونے اور طویل عرصے تک پابندی کا سامنا کرنا پڑ سکتا ہے۔
فیفا نے آج بُدھ کو یہ اعلان کیا کہ اُس کی انضباطی کمیٹی نے یوروگوائے کے اسٹار کھلاڑی کے خلاف اس الزام کے تحت ضابطے کی کارروائی کا آغاز منگل کی رات اٹلی اور یوروگوائے کے مابین میچ کے اختتام کے چند گھنٹوں بعد ہی شروع کر دیا تھا۔ اگر تحقیقاتی پینل نے سواریز کو مجرم پایا تو فیفا کے قوانین کے تحت اُس کے کھیلنے پر کم از کم 2 میچوں اور زیادہ سے زیادہ 24 مہینوں تک کے لیے پابندی عائد کر دی جائے گی۔
فیفا نے اس تفتیشی کارروائی کے لیے ٹیم سے برازیل کے مقامی وقت کے مطابق بُدھ کی شام پانچ بجے تک شواہد پیش کرنے کا مطالبہ کیا جن میں ویڈیو ریکارڈنگز بھی شامل ہیں۔ اس بارے میں فیفا کا حتمی فیصلہ آئندہ ہفتے کے دن سے پہلے پہلے سامنے آ جانا چاہیے کیونکہ ہفتے کو یوروگوائے ماراکانا اسٹیڈیم میں 16 میچوں کے راؤنڈ میں کولمبیا کے خلاف میچ کھیلے گا۔
گزشتہ منگل کو یوروگوائے اور اٹلی کی ٹیموں کا میچ ناٹال میں ہوا تھا جس میں یوروگرائے نے اٹلی کو صفر کے مقابلے میں ایک گول سے شکست دی تھی۔ اس فیصلہ کُن گول سے محض ایک منٹ قبل سواریز کا اٹلی کے کھلاڑی چیلینیز کے ساتھ تصادم ہوا جس میں سواریز نے بظاہر اس اطالوی کھلاڑی کے کندھے پر کاٹ لیا تھا اور یہ منظر ٹیلی وژن کیمرے کی آنکھوں سے چھپ نہ سکا اور اس کی ویڈیو بن گئی۔ میکسیکو سے تعلق رکھنے والے میچ کے ریفری روڈری گوئیز نے غالباً یہ سین نہیں دیکھا اور اس طرح اُن کی طرف سے اس پر کوئی ایکشن نہیں لیا گیا۔
اس بار برازیل میں ہونے والے فُٹ بال ولڈ کپ کی ہائی لائٹس میں اب تک ہونے والے آخری لمحات کے گولز، اسٹڈیم میں شائقین کا جوش و خروش اور سنسنی خیز لمحات وغیرہ ہیں تاہم منگل کو اٹلی اور یوروگوائے کے مابین ہونے والے میچ کے دوران اطالوی کھلاڑی کو یوروگوائے کے کھلاڑی کی طرف سے دانتوں سے کاٹنے کا سین بین الاقوامی میڈیا کی غیر معمولی دلچسپی کا سبب بنا ہے۔
27 سالہ سواریز اپنے کیرئیر میں پہلے بھی متعدد بار مخالف ٹیم کے کھلاڑیوں کو کاٹ چُکے ہیں۔ انہیں ایک بار ہالینڈ اور ایک بار برطانوی ٹیم کے کھلاڑی کو کاٹنے کے جرم میں معطل کیا جا چُکا ہے۔ اس بار سواریز نے اب تک اطالوی کھلاڑی جورجیو چیلینیز کو کاٹنے کا نہ انکار اور نہ ہی اقرار کیا ہے۔ سواریز نے یہ ضرور کہا کہ میچ کے دوران اطالوی دفاعی کھلاڑی نے اُس کی آنکھ پر مارا تھا اور اُسے اس بات پر بہت شدید غصہ تھا۔