ماہرین کا کہنا ہے کہ روس اور يورپی يونين کے مابين آج ہونے والی اس بات چیت میں شام کو اسلحہ فراہم کرنے سے متعلق يورپی کی جانب سے پابندی کے خاتمے اور فريقين کے مابين قدرتی گيس کی ترسيل سے متعلق تنازعات مرکزی اہميت کے حامل ہوں گے۔

اس اجلاس ميں ملکی صدر ولادی مير پوٹن يورپی کونسل کے صدر ہرمان فان رامپوئے اور يورپی کميشن کے سربراہ يوزے مانوئل باروسو سے ملاقات کريں گے۔ کہا جا رہا ہے کہ برسلز اور ماسکو حکام اس سربراہی کانفرنس ميں شام کے موضوع پر مجوزہ امن کانفرنس کی حمايت ميں بيان جاری کر کے اپنے تنازعات کو کم کرنے کی کوشش کر سکتے ہيں۔

اجلاس شروع ہونے سے قبل ایک بیان میں ماسکو کے یورپی یونین میں سفیر ولادی میر چیخوف کا کہنا تھا، ’’شام کا موضوع مذاکرات کے ترجیحاتی موضوعات میں سے ایک ہے‘‘۔

برسلز اور ماسکو حکام کے درمیان آج ہونے والے مذاکرات میں شام کا مسئلہ گفتگو کا غالب موضوع رہے گا۔ اس حوالے سے یورپی یونین کے اعلیٰ حکام کا کہنا ہے کہ کوہ یورال میں واقع صنعتی شہر یتاترنبرگ میں ہونے والے اس اجلاس کے دوران روس کا انسانی حقوق کا ریکارڈ بھی زیر بحث آسکتا ہے۔

مذاکرات کے آغاز سے پہلے روسی صدر ولادی میر پوٹن کی جانب سے يورپی کونسل کے صدر ہرمن فان رومپوئے اور يورپی کميشن کے سربراہ يوزے مانوئل باروسو کے اعزاز میں خیر سگالی عشائیہ بھی دیا گیا۔

ماسکو حکام اس بات کے لیے پر امید ہیں کہ وہ آج ہونے والے ان مذاکرات کے نتیجے میں یورپ کے لیے بغیر ویزہ سفر کرنے کی سہولت حاصل کرنے میں کامیاب ہوجائیں گے۔ اس کے علاوہ روس کی کوشش ہوگی کہ وہ یورپی یونین میں اپنے گیس منصوبے کے لیے بھی رعایت حاصل کرے۔ یورپی یونین کے نئے قوانین کے مطابق روس یورپی یونین میں گیس پائپ لائن یا اس سے متعلق دیگر تنصیبات قائم نہیں کرسکتا۔

شام کے مسئلے پر دونوں فریقین کے درمیان واضح تقسیم نظر آتی ہے۔ ایک طرف یورپی یونین اسد حکومت مخالف شامی اپوزیشن کی حمایتی ہے تو دوسری طرف پوٹن مسلسل ایک ایسی حکومت کی حمایت میں ڈٹے ہوئے جو سوویت دور سے ماسکو کی بڑی اتحادی ہے۔

zb/aba(AFP)