یورپی سربراہان مملکت و حکومت دو روزہ اجلاس میں شرکت کے لیے برسلز میں پہنچ رہے ہیں۔ یہ اجلاس آج جمعرات کو شروع ہو گا۔

انگیلا میرکل نے بدھ کے روز جرمن پارلیمان سے خطاب میں کہا، ’مجھے نہیں معلوم کہ آیا ہم کل اور پرسوں کسی حتمی نتیجے تک پہنچ جائیں گے۔ اگر ضروری ہوا تو ہم اگلے برس کے آغاز پر دوبارہ ملیں گے۔‘

مبصرین اس سربراہی اجلاس کو اس حوالے سے خاصی اہمیت دے رہے ہیں کیونکہ اس وقت یونان اور دیگر مالیاتی بحراں سے دوچار ریاستوں کی وجہ سے یورپی یونین کی بعض ریاستوں کے درمیان تناؤ پایا جاتا ہے۔ آج سے شروع ہونے والے اس سربراہی اجلاس میں سن 2014 تا 2020ء کے لیے یورپی بجٹ پر گفتگو ہو گی۔ جرمنی اس بجٹ میں سب سے زیادہ سرمایہ شامل کر رہا ہے۔

جرمنی کا موقف ہے کہ یہ بجٹ اسے صرف اسی صورت میں قبول ہو گا اگر اخراجات کی حد مقرر کی جائے۔ ادھر برطانیہ کی جانب سے خبردار کیا گیا ہے اگر یورپی ممالک یورپی اخراجات کی موجودہ حد برقرار رکھنے پر متفق نہیں ہوئے، تو وہ اس اجلاس میں اپنا ویٹو کا حق استعمال کر سکتا ہے۔

اگر یہ یورپی سمٹ نئے بجٹ کی منظوری میں ناکام رہی تو رواں ہفتے یہ دوسرا موقع ہو گا کہ یورپی یونین کی ایک اعلیٰ کانفرنس بے نتیجہ ختم ہو گی۔ اس سے قبل یورپی وزرائے خزانہ کا اجلاس یونان کے لیے امدادی سرمایے کی نئی قسط کے اجرا کے حوالے سے کسی فیصلے پر پہنچے بغیر ہی ختم ہو گیا۔

اسٹراس برگ میں یورپی پارلیمان سے خطاب میں یورپی کمیشن کے سربراہ یوزے مانوئیل باروسو نے یورپی رہنماؤں پر زور دیا کہ وہ رواں ہفتے کے اختتام تک بجٹ کی منظوری کے سلسلے میں اپنے اختلافات ختم کریں۔

at/ia (dpa)