جرمن خبر رساں ادارے ڈی پی اے نے یورپی یونین کے ذرائع کے حوالے سے بتایا ہےکہ یونین کے سال2013 کے بجٹ پر ہونے والے یہ مذاکرات فریقین کے مابین مفاہمت نہ ہونے کی وجہ سے بے نتیجہ رہے۔ اس سلسلے میں کوئی حل تلاش کرنے میں ناکامی کے بعد یورپی اراکین پارلیمان نے بجٹ پر ہونے والی بات چیت میں شامل ہونے سے انکار کردیا۔ اس ناکامی کے لیے فریقین نے ایک دوسرے کو ذمہ دار قرار دیا ہے۔

پارلیمانی بجٹ کمیٹی کے چیئرمین Alain Lamassoure کی طرف سے جاری کیے گئے ایک بیان میں کہا گیا ہے کہ تحقیق، دیہی ترقی، انسانی امداد اور بیرون ملک اسٹڈی پروگرام Erasmus کے لیے فنڈز گزشتہ ماہ سے ہی کمی کا شکار ہیں۔ انہوں نے مزید کہا کہ رکن ممالک اگر 2012ء کے بجٹ کے اضافی اخراجات پر ہی متفق نہیں ہیں تو یورپی پارلیمنٹ ان سے 2013ء کے بجٹ پر بھی مذاکرات نہیں کر سکتی ہے۔

یورپی پارلیمان نے اخراجات کی مد میں138ارب یورو کا مطالبہ کیا تھا جبکہ بچتی اقدامات کی وجہ سے رکن ممالک اس مد میں صرف 133ارب یورو مختص کرنا چاہتے تھے۔ اس حوالے سے جمعہ کو ہونے والے مذاکرات بھی ناکام ہو گئے تھے۔ اب فریقین کو اگلے مالی سال کے بجٹ کے حوالے سے ایک نیا مسودہ یورپی کمیشن کے سامنے پیش کرنا ہو گا۔

یورپی یونین کے 2014ء تا 2020ء کے طویل المدتی بجٹ کو حتمی شکل دینے کے لیے مذاکرات آئندہ ہفتے ہو رہے ہیں۔ اس تناظر میں متعدد یورپی سیاستدانوں نے خبردار کیا ہے کہ اگر یورپی یونین کے آئندہ سال کے بجٹ پر اتفاق رائے نہ ہوا تو صورتحال مزید پرتناؤ ہو سکتی ہے۔ یہ امر اہم ہے کہ یورپی یونین اپنے بجٹ میں اضافے کی خواہاں ہے جبکہ برطانیہ سمیت کچھ رکن ریاستیں ایسا نہیں چاہتیں۔

( ab /ai (AFP,dpa