جمعہ ستائیس جون کو برسلز میں اپنے اختتام کو پہنچنے والی یورپی یونین کی اس سربراہ کانفرنس نے یُنکر کی صورت میں ایک ایسے سیاستدان کو یورپی کمیشن کا صدر نامزد کیا ہے، جس نے اس سے پہلے یورپ بھر میں انتخابی مہم میں خود کو چوٹی کے اس عہدے کے لیے پیش کیا، جو اس سے پہلے کبھی نہیں ہوا تھا۔

اب تک یورپی کمیشن یورپی یونین کے رکن ملکوں کی قومی حکومتوں کے نمائندہ ادارے یعنی یورپی کونسل سے ہدایات لیتا تھا۔ یُنکر کی نامزدگی کے ساتھ ہی اب اس طرح کے اختیارات کونسل کی بجائے پارلیمان کے ہاتھوں میں چلے جائیں گے۔

یورپی یونین میں یورپی پارلیمنٹ کا یہ بڑھتا ہوا عمل دخل بظاہر خوش آئند ہے اور اس کا نتیجہ آگے چل کر یہ بھی نکل سکتا ہے کہ یونین کے معاملات زیادہ شفاف اور جمہوری ہو جائیں لیکن دوسری طرف یہ ضروری بھی نہیں ہے کہ ایسا ہی ہو۔ پہلے تو اُس نقصان کو کم سے کم رکھنے کی کوشش کرنا ہو گی، جو یُنکر کی نامزدگی کے عمل کے دوران رکن ملکوں کے باہمی تعلقات کو پہنچا ہے۔

اب تک کی صورتِ حال کے پیشِ نظر یہ کہا جا سکتا ہے کہ برطانوی وزیر اعظم ڈیوڈ کیمرون کی تمام تر مخالفت کے باوجود یُنکر کی نامزدگی برطانیہ کو یورپی یونین سے اور بھی دور لے جا سکتی ہے اور برطانیہ یونین سے نکل جانے کا بھی فیصلہ کر سکتا ہے۔ یُنکر کی نامزدگی کی صورت میں یونین کی تاریخ میں پہلی مرتبہ کوئی فیصلہ ایک بڑے رکن ملک یعنی برطانیہ کی مرضی کے خلاف کیا گیا ہے۔

اس سربراہ کانفرنس کے دوران خارجہ سیاست میں بھی ایک بڑا فیصلہ کیا گیا اور وہ فیصلہ بھی اپنے اندر کئی خطرات لیے ہوئے ہے۔ یوکرائن، جارجیا اور مولدووا کے ساتھ آزاد تجارت اور شراکت کے معاہدے یورپی یونین کے لیے ایک بڑی ذمے داری بھی بن گئے ہیں۔ ان معاہدوں کی صورت میں روس کے ساتھ سیاسی محاذ آرائی کی صورتِ حال اور بھی شدید ہو گئی ہے، یہ اور بات ہے کہ زیادہ تر رکن ممالک ایسا نہیں سمجھتے۔ بالفرض روس نے ان معاہدوں کی وجہ سے ان تینوں ممالک کو اقتصادی شعبے میں تنگ کرنا شروع کر دیا تو پھر کییف، طبلیسی اور چسیناؤ حکومتوں کی مالی مدد کرنا یورپی یونین کی ذمے داری بن جائےگی۔

یورپی یونین کی جمہ ستائیس جون کو برسلز میں اختتام کو پہنچنے والی دو روزہ سربراہ کانفرنس کا آغاز جمعرات چھبیس جون کو بیلجیم ہی کے شہر ’ای پریس‘ میں اُس تقریب سے ہوا تھا، جس میں پہلی عالمی جنگ کے آغاز کی یاد تازہ کی گئی۔ یورپی سربراہانِ امملکت و حکومت نے اس جنگ میں مرنے والوں کی یاد پر پھول چڑھاتے ہوئے اس عزم کا اظہار کیا کہ آج کے دور میں یورپی ساتھی ممالک کے درمیان جنگ مزید ممکن نہیں رہی ہے۔