روئٹرز کے مطابق یورپی یونین کی طرف سے یہ پیشکش پیر 10 فروری کو کی جائے گی۔ یعنی یورپی یونین کے تجارتی امور کے سربراہ کارل ڈے گوخٹ اور ان کے امریکی ہم منصب مائیکل فورمین کے درمیان واشنگٹن میں ہونے والی براہ راست ملاقات سے محض ایک ہفتہ قبل۔ 28 رکنی یورپی یونین کے تجاری امور کے سربراہ امریکا کو بتائیں گے کہ وہ امریکی اشیاء کے لیے کس حد تک اپنی مارکیٹ کھول سکتے ہیں، جس کے جواب میں امریکی حکام کی طرف سے بھی اسی طرح کی پیشکش متوقع ہے۔

یورپی یونین کی اس پیشکش کے بارے میں قریبی معلومات رکھنے والے ذرائع نے خبر رساں ادارے روئٹرز کو بتایا کہ یورپی یونین امریکا سے درآمد کی جانے والی اشیاء پر موجودہ ڈیوٹیز کی شرح میں 96 فیصد تک کمی پر رضامندی کا اظہار کرے گا۔ تاہم بقیہ چند حساس اشیاء پر یہ ڈیوٹیز برقرار رہیں گی جن میں گوشت اور پولٹری وغیرہ سے متعلق مصنوعات بھی شامل ہیں۔ روئٹرز کے مطابق دو دیگر یورپی اہلکاروں نے بھی اس پیشکش کی تصدیق کی ہے۔

یورپی یونین اور امریکا کے درمیان تجارتی سامان کے حوالے سے ٹیکسوں کی شرح پہلے ہی کافی کم ہے۔ دونوں فریقین ان ٹیکسوں میں مزید کمی کے اس معاہدے کو تجارتی حوالے سے انتہائی فائدہ مند تصور کرتے ہیں۔ دنیا کی کُل اقتصادی سرگرمی کے نصف کے قریب اس معاہدے کے بعد فریقین کے لیے سالانہ 100 بلین امریکی ڈالرز کے قریب مالی فائدہ متوقع ہے۔

اس معاہدے کے حوالے سے بات چیت کا آغاز گزشتہ برس جولائی میں ہوا تھا۔ پیر کے روز درآمدی ڈیوٹی میں کمی کی یہ متوقع پیشکش دراصل اس معاہدے کے حوالے سے پہلی اہم کامیابی ہوگی۔

روئٹرز کے مطابق یورپی کمیشن کی طرف سے ان اطلاعات پر تبصرہ کرنے سے انکار کر دیا گیا ہے۔ یورپی یونین کے ایک اہلکار کے مطابق کمیشن تجارتی معاہدے کے حوالے سے اگلے ہفتے آفرز کے تبادلے پر کام کر رہی ہے تاہم اس اہلکار نے مزید تفصیلات بتانے سے انکار کر دیا۔

باہمی تجارت کے حوالے سے اخراجات میں کمی کو دونوں اطراف کی کمپنیوں کے لیے فائدہ مند قرار دیا جا رہا ہے۔ خاص طور پر کار ساز ادارے مثلاﹰ فورڈ، جنرل موٹرز اور فوکس واگن کے امریکا اور یورپ میں موجود پلانٹس کو اس سے کافی فائدہ ہوگا۔

یورپی یونین کے ممالک سے امریکا درآمد کی جانے والی کاروں پر دو فیصد ڈیوٹی وصول کی جاتی ہے تاہم یورپی یونین نے امریکا سے درآمد کی جانے والی کاروں پر 10 فیصد کی شرح سے ڈیوٹی لاگو کی ہوئی ہے۔ ٹرکوں اور دیگر تجارتی گاڑیوں پر ڈیوٹی کی شرح اس سے بھی زائد ہے جس سے آٹو میکرز کو سالانہ ایک بلین امریکی ڈالرز تک کا اضافی بوجھ برداشت کرنا پڑتا ہے۔