برسلز سے موصولہ رپورٹوں کے مطابق یورپی یونین کے رہنماؤں نے ایتھنز کو ہنگامی بنیادوں پر اربوں یورو کی رقوم کی جو پیشکش کی ہے، اس سے قبل یونین کی قیادت نے یونان کو درپیش حالات کو ’انسانی بنیادوں پر امداد کی اشد ضرورت کے حوالے سے ایک بحران‘ کا نام بھی دیا۔

تاہم یونین کے رکن ملکوں کی طرف سے یہ پیشکش اسی وقت ممکن ہوئی جب یونانی وزیر اعظم الیکسِس سِپراس نے دیگر یورپی رہنماؤں کو یقین دلایا کہ ان کی حکومت مالی اور اقتصادی اصلاحات کے ان تمام وعدوں کی ترجیحی خطوط پر وضاحت کرے گی، جو بیل آؤٹ پیکجز کی شرائط کے طور پر قرض دہندگان سے کیے گئے تھے۔

بیلجیم کے دارالحکومت میں یونین کی دو روزہ سربراہی کانفرنس کے دوران یونانی وزیر اعظم کے دیگر یورپی سربراہان مملکت و حکومت کے ساتھ بحرانی مذاکرات کے بعد یورپی کمیشن کے صدر ژاں کلود یُنکر نے کہا کہ کمیشن کی طرف سے ایتھنز کو دو بلین یورو مہیا کرنے کی تیاریاں کی جا رہی ہیں۔ یونان کو یہ دو ارب یورو یورپی یونین کے ان ترقیاتی فنڈز میں سے مہیا کیے جائیں گے، جو ابھی تک استعمال نہیں ہو سکے تھے۔

اس یورپی سربراہی کانفرنس کے ایجنڈے میں یوں تو کئی دیگر امور بھی شامل تھے لیکن ان موضوعات پر یونان کا مالی بحران حاوی رہا۔ کانفرنس کے بعد یورپی کمیشن کے صدر یُنکر نے صحافیوں کو بتایا، ’’یونان کو اس وقت شدید نوعیت کے سماجی مسائل کا بھی سامنا ہے۔ انسانی حوالے سے بحران کی سی صورت حال ہے۔ یورپی کمیشن کی طرف سے جو دو بلین یورو مہیا کرنے کا فیصلہ کیا گیا ہے، وہ یونانی خزانے میں نہیں جائیں گے بلکہ ان کے ذریعے ترقی اور سماجی مضبوطی کے پروگراموں میں مدد کی جائے گی۔‘‘

اسی یورپی سمٹ کے موقع پر وزیر اعظم سِپراس نے کل جمعرات کو رات گئے تک جرمنی اور فرانس کے رہنماؤں کے ساتھ ساتھ کئی مرکزی یورپی اداروں کے سربراہوں کے ساتھ بھی تفصیلی مذاکرات کیے تھے۔ ان مذاکرات میں انہوں نے کہا تھا کہ وہ ایتھنز کی طرف سے قرض دینے والے اداروں یعنی یورپی یونین، یورپی مرکزی بینک اور بین الاقوامی مالیاتی فنڈ کے ساتھ کیے گئے اصلاحات کے وعدوں پر عملدرآمد کی رفتار تیز کر دیں گے۔

آج جمعے کے روز ملنے والی رپورٹوں کے مطابق الیکسِس سِپراس نے یہ وعدہ بھی کیا ہے کہ وہ آئندہ چند روز میں قرض دہندہ اداروں کو ایسے اقدامات کی ایک نئی فہرست مہیا کریں گے، جن پر عمل کرتے ہوئے ایتھنز حکومت لازمی مالیاتی اور اقتصادی اصلاحات کو یقینی بنانا چاہتی ہے۔

ایتھنز حکومت کی آئندہ دنوں میں مہیا کی جانے والی اصلاحاتی اقدامات کی اس نئی فہرست پر یورپی یونین کے رکن ملکوں کے وزرائے خزانہ ممکنہ طور پر آئندہ جمعے کے روز آپس میں مشاورت کریں گے۔

بحران زدہ یونان کو اب تک یورپی کمیشن، یورپی مرکزی بینک اور آئی ایم ایف کی طرف سے دو بیل آؤٹ پیکجز کی صورت میں 233 بلین یورو مہیا کیے جا چکے ہیں۔ ان دو پیکجز کی مجموعی مالیت 240 بلین یورو ہے، جن میں سے سات بلین یورو کی فراہمی ابھی باقی ہے۔