یورپی یونین نے جمعے کے روز واضح کیا کہ یونین کی روس کے ساتھ اگلی سمٹ آسان نہیں ہو گی۔ یورپی یونین کونسل کے صدر ہرمن فان رومپوئے کہا کہ روسی صدر ولادی میر پوٹن کے ساتھ اگلی میٹنگ میں باقاعدہ طور پر شکایت کی جائے گی کہ یوکرائن کے معاملے پر روسی مداخلت بے جا تھی۔ روس اور یورپی یونین کے درمیان سربراہی اجلاس اگلے سال جنوری کے آخر میں برسلز میں ہو گا۔ رومپوئے کا یہ بھی کہنا تھا کہ اس معاملے کو نظرانداز نہیں کیا جائے گا اور یونین کے خدشات اور تشویش کے حوالے سے کھل کر بات کی جائے گی۔

یورپی یونین کے سربراہ اجلاس میں یونین کے لیڈروں نے یوکرائن پر واضح کیا کہ پارٹنر شپ کا دروازہ کییف حکومت کے لیے کھلا ہے لیکن موجودہ یانوکووچ حکومت کے لیے یہ ضروری نہیں ہے۔ یورپی کونسل کے صدر ہرمن فان رومپوئے نے واضح کیا کہ یونین نے یوکرائن کو قابل اعتماد راستہ فراہم کیا تھا جو جدید اور ایک آزاد ملک کے لیے تھا۔ رومپوئے کا مزید کہنا تھا کہ کییف کے آزادی اسکوائر پر لوگوں کا ہجوم ایک بہتر مستقبل کی نوید ہے۔ یورپی یونین نے مقید سابق وزیر اعظم یولیا ٹیمو شینکو کی رہائی اور علاج کے لیے بیرون ملک روانگی کو بھی اہم قرار دیا ہے۔

یورپی یونین کے رہمناؤں نے جمعے کے روز کریڈٹ ریٹنگ اسٹینڈرڈ اینڈ پُور کی جانب سے یونین کی اقتصادی و معاشی پوزیشن کو ایک درجے کم کرنے کو ایک رائے قرار دیا ہے۔ بین الاقوامی کریڈٹ کمپنی نے یورپی یونین کی اقتصادی پوزیشن کو ڈبل اے پلس(AA+) کرتے ہوئے کہا کہ یونین کی معاشی آؤٹ لُک کو خطرات اور چیلنجز کا سامنا ہے۔ یورپی کمیشن کے صدر یوزے مانویل بارروسو نے ریٹنگ کمپنی کے اعلان پر تبصرہ کرتے ہوئے کہا کہ یونین ایک انتہائی قابل اعتماد مالیاتی ادارہ ہے۔ اِسی طرح یورپی یونین کونسل کے صدر ہرمن فان رومپوئے نے کہا کہ ایک درجے میں کمی سے یورپ میں کرسمس کا مزہ خراب نہیں ہو گا۔

یورپی یونین کی سمٹ میں وسطی افریقی جمہوریہ میں مشترکہ فوجی آپریشن شروع کرنے کا فیصلہ مؤخر کر دیا ہے۔ اب نئے سال کے پہلے مہینے میں ہونے والی سمٹ میں اِس مناسبت سے مشترکہ حکمت عملی طے کی جائے گی۔ سربراہ اجلاس میں شرکت کے بعد فرانسیسی صدر فرانسوا اولانڈ کا کہنا تھا کہ اُن کی حکومت فوجیوں کی شرکت کی بات نہیں کرتی لیکن اہم اور خصوصی مشنز کے حوالے سے یونین کی مدد چاہتی ہے۔ اولانڈ کے مطابق ہوائی اڈے، ہسپتالوں کی سکیورٹی اور ادویات کی سپلائی کے علاوہ انسانی ہمدردی کے معاملات میں معاونت وقت کی ضرورت ہے۔

جمعہ 20 دسمبر کو ختم ہونے والے سربراہ اجلاس میں یورپی لیڈران نے واضح کیا کہ یورپ کا خطرناک سمندری سفر اختیار کرنے والے غیر قانونی تارکین وطن کی ہر ممکن طریقے سے حوصلہ شکنی کی جائے گی۔ سربراہ اجلاس میں یہ طے کیا گیا کہ اس صورت حال کو بہتر کرنے کے لیے دوسرے ملکوں سے مدد حاصل کرنا اہم ہے۔ یونین نے تجویز کیا ہے کہ بہتر اور مؤثر معلوماتی و اطلاعاتی مہم کے علاوہ غیرقانونی تارکین وطن کو واپس بھیجنے کی بہتر پالیسی اختیار کی جائے گی۔ اس مناسبت سے بنیادی سطح پر پیش کی جانے والی تجاویز کو اگلے سال جون میں ہونے والے سربراہ اجلاس میں زیرِ بحث لایا جائے گا۔