توقع ظاہر کی جا رہی ہے کہ اس مرتبہ سمجھوتہ طے پا جائےگا، تاہم خبر رساں ادارے اے ایف پی کے مطابق یہ بات چیت طویل اور مشکل رہے گی۔ بہت سی رکن ریاستیں اپنے ہاں بچتی اقدامات کے تناظر میں بجٹ میں کٹوتی پر زور دے رہی ہیں۔ اس بات پر عدم اتفاق ہی گزشتہ اجلاس کی ناکامی کا باعث بنا تھا۔

اس تناظر میں جرمنی اور برطانیہ کا مطالبہ ہے کہ یورپی یونین کے بجٹ میں رکن ریاستوں کے بچتی پروگراموں کے مساوی کٹوتی کی جائے جبکہ فرانس اور اٹلی کا کہنا ہے کہ ملازمتوں کے مواقع پیدا کرنے اور شرح نمو میں مددگار بننے والے شعبوں میں سرمایہ کاری کے لیے رقوم مختص کی جائیں۔

قبل ازیں یورپی کمیشن آئندہ بجٹ کے لیے رکن ریاستوں کے حصے میں آنے والی رقوم میں 5.0 فیصد اضافہ چاہتا تھا تاہم یورپی کونسل کے صدر ہیرمان فان رومپوئے نے بعدازاں ایک ٹریلین یورو سے زائد کے مجوزہ بجٹ کو کم کر کے 973 ارب یورو کر دیا تھا۔ اب ہدف یہ ہے کہ بجٹ کو نو سو ارب یورو کے قریب لے جایا جائے۔

گو کہ اختلافات پیچیدہ نوعیت کے ہیں تاہم گزشتہ دِنوں جرمن چانسلر انگیلا میرکل نے اُمید ظاہر کی تھی کہ مذاکرات مشکل لیکن کامیاب رہیں گے۔ ان کا کہنا تھا کہ بجٹ کے حوالے سے معاہدے کے لیے وہ ’بہت پُرامید‘ ہیں۔

برلن میں اطالوی وزیر اعظم ماریو مونٹی کے ساتھ ملاقات کے بعد ایک مشترکہ نیوزکانفرنس سے خطاب میں انہوں نے کہا تھا: ’’یورپی یونین کے طویل المدتی بجٹ کے بارے میں مجھے بہت اُمید ہے کہ ہم کامیاب رہیں گے، ہم معاہدے تک پہنچ جائیں گے۔‘‘

اختلافات ہی کے تناظر میں اپنے ایک حالیہ انٹرویو میں یورپی پارلیمنٹ کے صدر مارٹن شلز نے کہا تھا کہ یورپی یونین کا مستقبل خطرے میں ہے۔ مارٹن شلز نے یہ بات جرمن اخبار ’گینیرال آنسائیگر‘ سے گفتگو میں کہی تھی جو اس اخبار کے بون ایڈیشن کی پیر کی اشاعت میں شامل تھی۔

اپنے اس انٹرویو میں انہوں نے کہا کہ یورپی یونین کی بقا خطرے میں ہے۔ ان کا کہنا ہے کہ یہ بلاک بڑی حد تک عوامی حمایت کھو چکا ہے۔ مارٹن شلز نے کہا: ’’جب لوگ کسی پراجیکٹ یا نظریے سے منہ موڑ لیتے ہیں تو ایک وقت ایسا آتا ہے جب اس کا خاتمہ ہو جاتا ہے۔‘‘

ng/zb (AFP, Reuters, dpa)