بیلجیم کے دارالحکومت برسلز میں، جہاں یورپی یونین کے صدر دفاتر قائم ہیں اور جہاں یہ سربراہی کانفرنس جاری ہے، اجلاس کے شرکاء کے قریبی سفارتی ذرائع نے جمعے کی سہ پہر بتایا کہ اس اجتماع کے اختتام تک یورپی رہنما مجوزہ بجٹ کی مالیت میں کمی پر متفق ہو جائیں گے۔

اگر کانفرنس میں شریک ستائیس ملکوں کے سربراہان مملکت و حکومت کسی حتمی حل تک پہنچ گئے تو یونین کی چھ عشروں پر محیط تاریخ میں یہ پہلا موقع ہو گا کہ اس بلاک کے بجٹ میں کمی کا کوئی فیصلہ کیا جائے گا۔ یورپی یونین کی اس سربراہی کانفرنس کا واحد موضوع یونین کا 2014ء سے لے کر 2020ء تک سات سال کے عرصے کا وہ مجوزہ بجٹ ہے، جس پر کسی تصفیے کے لیے ایسی ہی ایک کانفرنس گزشتہ برس نومبر میں بھی ہوئی تھی مگر وہ ناکام رہی تھی۔

یہ بھی بتایا گیا ہے کہ اس وقت کوشش کسی ایسے تصفیے تک پہنچنے کے لیے کی جا رہی ہے، جس کے تحت موجودہ عشرے کے آخر تک یونین کے بجٹ اخراجات میں قریب تین فیصد تک کی کٹوتی کی جا سکے۔

کل اس کانفرنس کے پہلے روز یورپی صدور اور وزرائے اعظم نے اپنی جو مشاورت شروع کی، وہ چھوٹے سے وقفے کے ساتھ 19 گھنٹے تک جاری رہنے کے بعد جمعے کی صبح ختم ہوئی تھی۔ آج کی کارروائی مغربی یورپی وقت کے مطابق جمعے کو بعد دوپہر ایک بجے شروع ہوئی اور سفارتی ذرائع کے بقول امکان ہے کہ اس بجٹ تنازعے میں آج ہی کوئی نہ کوئی حل تلاش کر لیا جائے گا۔

اس کانفرنس میں برطانوی وزیر اعظم ڈیوڈ کیمرون نے بظاہر جرمن چانسلر انگیلا میرکل کی حمایت کے ساتھ یہ مؤقف اپنایا کہ جس طرح یونین کے رکن کئی ملک اپنے ہاں بچتی پالیساں متعارف کرا رہے ہیں، اُسی طرح خود یونین کو بھی مالی بچت کی سوچ کا عملی مظاہرہ کرنا چاہیے۔

اس کے برعکس فرانس، اٹلی اور چند دیگر ملکو‌ں کا مؤقف یہ ہے کہ بجٹ اخراجات میں کوئی کمی نہیں کی جانا چاہیے تاکہ یونین اور یورو زون میں اقتصادی بحران اور بے روزگاری کی ریکارڈ حد تک اونچی شرح کے دور میں معاشی ترقی کی رفتار میں تیزی لائی جا سکے۔

یونین کے اگلے سات سال کے بجٹ کے لیے جو تجاویز شروع میں پیش کی گئی تھیں، ان کی مالیت ایک ٹریلین یورو سے زائد تھی۔ سفارتی ذرائع کے مطابق اب کافی امکان یہ ہے کہ ان تجاویز کی مالیت میں تین فیصد تک کی کمی کر دی جائے گی۔ یعنی 2014ء سے 2020ء تک یونین کے مجوزہ اخراجات کی مالیت 908.4 بلین یورو ہو گی، اور ممکنہ اچانک تبدیلیوں کے باوجود یہ مالیت 960 بلین یورو سے زیادہ کسی بھی صورت میں نہیں ہو گی۔

یورپی کمیشن نے شروع میں جو بجٹ تجاویز پیش کی تھیں، ان کی مالیت پانچ فیصد اضافے کے ساتھ ایک ہزار 40 بلین یورو بنتی تھی، جو یونین کی مجموعی قومی پیداوار کے ایک فیصد کے برابر تھی۔ اب اس میں ممکنہ طور پر 80 بلین یورو سے لے کر 132 بلین یورو تک کی کمی کر دی جائے گی۔

(mm / ab (AP, AFP, Reuters