یورپی یونین کا دو روزہ سربراہی اجلاس جمعرات کو رات گئے اپنے آغاز کے تقریبا ایک گھنٹے بعد ملتوی کر دیا گیا۔ اس کانفرنس میں اس وقفے کی وجہ یہ بتائی گئی کہ یورپی رہنماؤں کو بجٹ کے مسودے پر غور کرنے کا موقع فراہم کیا جائے۔ جرمن چانسلر انگیلا میرکل نے کہا ہے کہ ممکنہ طور پر یورپی رہنماؤں کو یونین کے آئندہ سات برسوں کے لیے تجویز کردہ بجٹ مسودے پر اتفاق رائے میں کافی وقت لگ سکتا ہے۔ تاہم انہوں نے یہ بھی کہا کہ اس حوالے سے یورپی رہنماوں میں اتفاق رائے کے حوالے سے ’کسی حد تک پیش رفت‘ ہوئی ہے۔

جرمن چانسلر انگیلا میرکل نے کہا ہے کہ جرمنی یورپی یونین کے مستقبل کے لیے ان مذاکرات میں تعمیری کردار ادا کرے گا۔ ان کے بقول موجودہ اقتصادی صورتحال میں یہ خیال رکھنے کی ضرورت ہے کہ اخراجات بہت زیادہ نہ ہوں۔

دوسری جانب فرانسیسی صدر فرانسوا اولاند نے کہا ہے کہ وہ یورپی یونین کے آئندہ بجٹ کے لیے پیش کردہ مسودے سے مطمئن نہیں۔ انہوں نے خبردار کیا کہ وہ اس اجلاس میں زراعت کے شعبے کے لیے مزید سرمایے کی فراہمی پر زور دیتے رہیں گے۔ ’میں فی الحال بجٹ منصوبے کے مسودے پر مطمئن نہیں ہوں۔ ہمارے لیے یہ کٹوتی اب بھی بہت زیادہ ہے۔‘

واضح رہے کہ یورپی یونین کے سن 2014 تا 2020 کے لیے بجٹ کے سلسلے میں یورپی رہنما برسلز میں جمع ہیں۔ جمعرات کے روز شروع ہونے والے اجلاس میں یورپی کمیشن کی جانب سے بجٹ مسودہ پیش کیا گیا۔ اس حوالے سے یورپی ممالک میں خاصا اختلاف رائے پایا جاتا ہے۔ برطانیہ، جرمنی اور ہالینڈ جیسے ممالک مختلف شعبوں میں بجٹ کٹوتی کے خواہش مند ہیں جبکہ فرانس اور پولینڈ جیسے دوسرے سبسڈی حاصل کرنے والے ممالک ان کٹوتیوں کے خلاف ہیں۔

جمعرات کے روز یورپی کونسل کے صدر ہیرمن فان رومپوئے نے 2014ء تا 2020ء کے بجٹ کا نیا مسودہ پیش کیا۔ اس سے قبل برطانوی وزیر اعظم ڈیوڈ کیمرون کہہ چکے ہیں کہ وہ 2020ء تک سالانہ بجٹ کو 2011ء والے بجٹ کی سطح پر منجمد کر دینا چاہتے ہیں۔ ان کا کہنا تھا کہ دوسری صورت میں برطانیہ یونین میں اپنا ویٹو کا حق بھی استعمال کر سکتا ہے۔

at/sks (dpa/AFP)