یورپی یونین کے طویل المدتی بجٹ پر کسی سمجھوتے کے امکانات معدوم ہوتے دکھائی دے رہے ہیں۔ جمعرات کی شب برسلز میں شروع ہونے والی یورپی یونین کی دو روزہ سربراہی سمٹ میں اس بجٹ پر بحث ہونا تھی تاہم اس سمٹ کی سربراہی کر رہے یورپی یونین کے صدر ہیر من فان رومپوئے نے ایک گھنٹے بعد ہی شدید اختلافات کے باعث سمٹ کی کارروائی کو آج جمعے تک کے لیے ملتوی کر دیا۔

برطانوی وزیر اعظم ڈیوڈ کیمرون اس بجٹ میں مزید کٹوتیوں کے اپنے مطالبے پر قائم ہیں جبکہ جرمن چانسلر انگیلا میرکل نے پیش گوئی کی ہے کہ اس حوالے سے اختلافات ختم کرنے کے لیے مزید وقت درکار ہو گا۔

آج بروز جمعہ دوسرے دن اس سمٹ کے آغاز سے قبل ہی برطانوی وزیر اعظم نے کہہ دیا تھا، ’’میرا نہیں خیال کہ اس ضمن میں کوئی خاص پیشرفت ہوئی ہے۔‘‘ کیمرون کا مؤقف ہے کہ یونین کے اخراجات میں کمی کرنا ناگزیر ہے۔ نیوز ایجنسی ڈی پی اے نے ایک سفارتکار کے حوالے سے بتایا ہے کہ جرمن چانسلر انگیلا میرکل نے بھی ہیرمن فان رومپوئے اور یورپی کمیشن کے صدر باروسو سے اپنی ملاقاتوں میں مجوزہ بجٹ میں قریب 110 بلین یورو کی کٹوتیوں کی حمایت کی ہے۔

ہالینڈ کے وزیر اعظم مارک رُٹے نے بھی کہا کہ ابھی تک اس بجٹ کے مسودے پر اتفاق رائے نہیں ہو سکا ہے۔ انہوں نے کہا، ’’ہم ہالینڈ میں بھی بچت کر رہے ہیں اور یورپ بھر کے ملکوں میں بچتی اقدامات اختیار کیے جا رہے ہیں۔ یونین کو بھی واضح کرنا چاہیے کہ وہ اخراجات میں کمی کے لیے تیار ہے۔‘‘

آج سمٹ کے دوسرے دن کی کارروائی سے قبل صحافیوں سے گفتگو کرتے ہوئے آسٹریا کے چانسلر Werner Faymann نے بھی اس بجٹ پر اتفاق رائے کے حوالے سے شک کا اظہار کیا تھا۔ دوسری طرف فرانسیسی صدر فرانسوا اولانڈ نے یورپی یونین کے صدر ہیرمن فان رومپوئے پر تنقید کرتے ہوئے کہا کہ زراعت کے شعبے میں مزید رقوم مختص کی جانی چاہییں۔ اسی دوران یورپی یونین کے سربراہ ہیرمن فان رومپوئے نے 2014ء سے 2020 تک کے بجٹ کا نیا مسودہ پیش کر دیا ہے۔

آج میڈیا سے گفتگو کرتے ہوئے جرمن چانسلر انگیلا میرکل نے بھی ایسے شکوک کا اظہار کیا کہ شاید رواں ہفتے اس بجٹ پر اتفاق کرنا مشکل ہے۔ انہوں نے کہا، ’’ابھی اس حوالے سے مزید وقت درکار ہو گا۔ انہوں نے کہا کہ یورپی رہنماؤں نے تھوڑی بہت پیشرفت دکھائی ہے، ’’لیکن آیا ہم کسی نتیجے پر پہنچ جائیں گے، اس بارے میں مَیں شکوک رکھتی ہوں۔‘‘

متعدد یورپی رہنماؤں نے کہا ہے کہ یونین کے طویل المدتی بجٹ پر متفق ہونے کے لیے جنوری یا فروری میں ایک اور سمٹ کا انعقاد کیا جائے تاکہ اس دوران اس حوالے سے پائے جانے والے اختلافات کو دور کیا جا سکے۔

( ab /aa (AFP,dpa