اس سال مئی میں یونین کے رکن 28 ملکوں میں عام ووٹر یورپی پارلیمان کے نئے ارکان کا براہ راست انتخاب کریں گے۔ پھر سٹراس بُرگ میں یورپی پارلیمان کے نو منتخب ارکان جولائی میں نیا پارلیمانی اسپیکر چنیں گے۔

اس کے بعد نومبر میں یورپی سربراہان مملکت و حکومت یونین کے انتظامی بازو یعنی یورپی کمیشن کا نیا صدر نامزد کریں گے۔ نئے صدر کمیشن کے موجودہ سربراہ یوزے مانوئل باروسو کی جگہ لیں گے، جن کے عہدے کی پانچ سالہ مدت نومبر میں پوری ہو رہی ہے۔

یورپی یونین کے سیاسی بازو کا نام یورپی کونسل ہے۔ یہ اس بلاک میں شامل تمام 28 رکن ملکوں کا نمائندہ سیاسی ادارہ ہے۔ اس کے موجودہ صدر کا نام ہیرمان فان رومپوئے ہے۔ اسی سال یورپی رہنماؤں کو یورپی کونسل کا نیا صدر بھی نامزد کرنا ہے۔

یورپی یونین کے خارجہ سیاسی امور کے نگران عہدیدار کا عہدہ 2009ء میں قائم کیا گیا تھا۔ پہلی مرتبہ اس عہدے پر برطانیہ کی کیتھرین ایشٹن کی تقرری عمل میں آئی تھی۔ ان کے عہدے کی مدت بھی اسی سال پوری ہو رہی ہے۔ اس لیے سال رواں کے آخر تک یورپی یونین میں شامل ملکوں کے رہنماؤں کو کیتھرین ایشٹن کی جانشین سیاسی شخصیت کے نام پر بھی اتفاق کرنا ہو گا۔

یورپی یونین کے ان انتہائی اہم عہدوں پر انتخاب کے لیے مختلف سیاسی شخصیات کو مضبوط امیدوار قرار دیا جا رہا ہے۔

پارلیمانی اسپیکر

یورپی پارلیمان کے اسپیکر کے عہدے کے لیے ابھی تک کوئی امیدوار فیورٹ نہیں ہے۔ نئے اسپیکر کے انتخاب کا انحصار اس بات پر ہو گا کہ مئی کی 22 سے لے کر 25 تاریخ تک ہونے والے پارلیمانی الیکشن کے نتیجے میں 751 رکنی ایوان میں اکثریت کس پارلیمانی سیاسی گروپ کو ملتی ہے۔ ممکنہ اسپیکر کے طور پر جو نام کسی حد تک سننے میں آ رہا ہے، وہ بیلجیم کے سابق وزیر اعظم گائی فیرہوف شٹٹ کا نام ہے۔

یورپی کمیشن کے نئے صدر

پارلیمانی الیکشن کے نتائج کا براہ راست اثر اس بات پر پڑے گا کہ یورپی کمیشن کا نیا صدر اور یوزے مانوئل باروسو کا جانشین کون ہو گا۔ اس عہدے کے لیے مضبوط امیدواروں کے طور پر لکسمبرگ کے سابق وزیر اعظم ژاں کلود یُنکر اور یورپی پارلیمان کے اب تک کے اسپیکر مارٹن شُلس کے نام لیے جا رہے ہیں۔ یورپی کمیشن کے صدر یونین کے 28 کمشنروں کی اس ٹیم کی سربراہی کرتے ہیں، جس کے لیے ہر رکن ملک سے ایک کمشنر لیا جاتا ہے۔

یورپی کونسل کے نئے صدر

یورپی یونین کے سیاسی بازو یورپی کونسل کے نئے صدر اور ہیرمان فان رومپوئے کے جانشین کے طور پر انتخاب کے لیے کئی امیدوار میدان میں ہیں۔ ان میں لکسمبرگ کے سابق وزیر اعظم ژاں کلود یُنکر، آئرش وزیر اعظم اینڈا کَینی، آسٹریا کے ویرنر فائی مان اور لیتھوانیا کی خاتون صدر ڈالیا گریباؤسکائٹے شامل ہیں۔

فارن پالیسی چیف

یورپی یونین کے خارجہ پالیسی کے نگران عہدیدار کا دفتر چند برسوں میں اتنا پھیل چکا ہے کہ اب اس کے ذیلی دفاتر دنیا بھر میں قائم ہیں اور اس کے عملے کی مجموعی تعداد تین ہزار کے قریب ہے۔ اس وقت یہ عہدہ برطانیہ کی کیتھرین ایشٹن کے پاس ہے۔ اس عہدے کے لیے مضبوط امیدواروں میں پولینڈ اور سلوواکیہ کے وزرائے خارجہ کے علاوہ ان کے آسٹرین اور سویڈش ہم منصب بھی شامل ہیں۔