دس ممالک کی پولیس نے یورپ بھر میں کیے گئے ایک مربوط آپریشن میں منشیات کی اسمگلنگ، منی لانڈرنگ اور دیگر جرائم میں ملوث 44 افراد کو گرفتارکر لیا ہے۔ یورپی یونین کے قانون نافذ کرنے والے ادارے یورو پول اور یورپی عدالتی اتھارٹی یوروجسٹ نے ایک مشترکہ بیان میں اعلان کیا، ''گرفتار افراد پر ایک سنگین خطرناک مجرمانہ نیٹ ورک سے تعلق رکھنے کا شبہ ہے، جسے یورپی یونین میں سب سے زیادہ خطرناک سمجھا جاتا ہے۔‘‘

ہیمبرگ میں یورپی تاریخ کی سب سے بڑی برآمدگی، سولہ ٹن کوکین

حکام نے بتایا کہ یہ نیٹ ورک جرمنی، فرانس اور جمہوریہ چیک سمیت کئی یورپی ممالک میں متحرک ہے۔ نیٹ ورک سے منسلک  مشتبہ افراد کو جمہوریہ چیک، لٹویا، لتھوانیا، فرانس، جرمنی، پولینڈ، ناروے، سلوواکیہ، ہنگری اور اسپین کے ساتھ ساتھ امریکہ سے گرفتار کیا گیا۔

 'ایک کمپنی کی طرح تشکیل دیا گیا‘ جرائم کا نیٹ ورک

تفتیش کاروں کا خیال ہے کہ اس مجرمانہ نیٹ ورک کے یورپ سے باہر منشیات کے اسمگلروں سے بھی رابطے ہیں۔ حکام نے کہا، ''اس مجرمانہ نیٹ ورک کا صرف منشیات اسمگلنگ کا پیمانہ اتنا بڑا ہے کہ اس کی سرگرمیاں تین براعظموں میں رپورٹ ہوئی ہیں۔‘‘ پولیس نے یورپ بھر میں 90 سے زائد چھاپوں میں کوکین، چرس، بھنگ اور میتھمفیٹامائن سمیت بڑی مقدار میں منشیات برآمد کیں، ''دوسری اشیاء سمیت منشیات کی کھیپ  بحری جہازوں اور ٹرکوں میں پائی گئی ہے، جو اکثر  خفیہ مقامات پر رکھی جاتی تھیں۔‘‘

ڈارک نیٹ پر منشیات اسمگلنگ: بین الاقوامی کارروائی

کہا جاتا ہے کہ اس نیٹ ورک کا ڈھانچہ ایک کمپنی کی طرح ہے۔ اس نیٹ ورک کا حصہ مختلف جرائم پیشہ گروہ منشیات کی بھاری کھیپ کو منظم کرنے سے لے کر ان کی سرحدوں کے پار تقسیم تک، منشیات کی اسمگلنگ کے پورے سلسلے کو کنٹرول کرنے کی کوشش کرتے ہیں۔

یورپ کی انتہائی مطلوب مجرم خواتین

یوروپول کے خطرناک منظم جرائم کے انسداد کے شعبے کے سربراہ جیری لیوکو نے کہا، ''مجرم سرحدوں کے پار تعاون کرنے میں اچھے ہوتے ہیں، آج کی اس طرح کی کارروائیوں سے یہ ظاہر ہوتا ہے کہ قانون نافذ کرنے والے اور عدالتی حکام بھی ایسا ہی کر سکتے ہیں۔‘‘

 اس سلسلے میں بین الاقوامی تحقیقات کی قیادت لتھووانیا کے پراسیکیوٹر جنرل کے دفتر اور لتھوانیائی فوجداری پولیس بیورو نے کی۔

 ش ر ⁄ ع س ( اے ایف پی، ڈی پی اے)