یورپ عرب ممالک کا ساتھ دے، جرمن صدر
27 فروری 2011![](https://static.dw.com/image/6450924_800.webp)
خلیجی ممالک کے دورے کے پہلے دن کویت پہنچنے پر جرمن صدر کرسٹیان وولف نے یورپی ممالک سے مطالبہ کیا کہ وہ عرب ممالک میں جمہوریت کے حامی عوام کا ساتھ دینے کے لیے اپنی کوششوں میں مزید تیزی لائیں۔ اس موقع پر انہوں نے بالخصوص یورپی یونین کے رکن ممالک سے یہ اپیل بھی کی کہ ایسے لوگوں کی مدد کے لیے آگے بڑھیں، جو پائیدار جمہوریت کے قیام کے لیےسڑکوں پر نکلے ہیں۔
جرمن صدرکرسٹیان وولف نے کہا کہ عرب ممالک میں مستقل جمہوریت کے نتیجے میں علاقائی سطح پر استحکام آئے گا۔ انہوں نے اس مقصد کے لیے جرمن حکومت کے بھر پور تعاون کا یقین بھی دلایا۔ کرسٹیان وولف نے کہا،’ یورپ کو یہ کوشش ضرور کرنی چاہیے کہ وہ عرب ممالک میں ایک مثبت تبدیلی کے لیے نہ صرف عملی اقدامات اٹھائے بلکہ ساتھ ہی تعمیری تجاویز بھی پیش کرے۔‘
ہفتے کے دن جرمن صدر نے کویت میں عراقی حملے کے بعد آزادی کی 20 سالہ خصوصی تقریبات میں شرکت بھی کی، جس کے بعد انہوں نے کویت کے امیر شیخ صبا الاحمد الجبار کے علاوہ دیگر ملکی رہنماؤں سے ملاقاتیں کیں۔
جرمن صدر کرسٹیان وولف گلف ممالک کا دورہ ایک ایسے وقت میں کر رہے ہیں، جب مشرق وسطیٰ اور شمالی افریقی ممالک میں آمرانہ طرز حکمرانی کے خلاف عوام اٹھ کھڑے ہوئے ہیں۔ اپنے اس دورے سے قبل لیبیا کے رہنما معمر قذافی پر تبصرہ کرتے ہوئے وولف نے انتہائی سخت الفاظ کا استعمال کرتے ہوئے، قذافی کو ’نفسیاتی مریض‘ قرار دیا تھا۔
جرمن صدراور ان کی اہلیہ دورہ کویت کے بعد ہفتے کے دن ہی قطر پہنچ گئے تھے۔ جرمن صدر کے ہمراہ جرمن تاجروں کا ایک وفد بھی شامل ہے۔ توقع کی جا رہی ہے کہ سیاسی معاملات پر گفتگو کے ساتھ ساتھ دونوں ممالک کے مابین اقتصادی سطح پر بھی کئی اہم معاہدوں کو حتمی شکل دی جائےگی۔
رپورٹ: عاطف بلوچ
ادارت: افسر اعوان