جرمن کلب شالکے کو ہالینڈ کے فٹ بال کلب ٹوینٹ (Twente) کے ساتھ کھیلے گئے میچ میں شکست کا سامنا رہا۔ اس مقابلے میں شالکےکلب کے جوئل ماٹِپ (Joel Matip) کو ریفری نے سرخ کارڈ دکھا کر میچ سے باہر کردیا تھا۔ جرمن کلب نے ریڈ کارڈ دکھائے جانے کے بعد ولندیزی کلب ٹوینٹ کے خلاف اپنا میچ دس کھلاڑیوں کے ساتھ مکمل کیا۔ میچ کے ساٹھویں منٹ میں شالکے کے جوئل ماٹِپ کو سنگین فاؤل کرنے پر سرخ کارڈ دکھایا گیا۔ اس فاؤل پر ڈچ کلب کو پنلٹی دی گئی اور اس پر لُوک ڈے ژونگ (Luuk de Jong) نے گول کر دیا۔ یہی گول شالکے کی شکست کا باعث بنا۔

یہ میچ ہالینڈ کے شہر Enschede میں کھیلا گیا۔ یہی شہر ٹوینٹ کا گھر کہلاتا ہے۔ اب اگلی جمعرات کو ٹوینٹ دوسرے راؤنڈ کا میچ کھیلنے شالکے کے ہوم گراؤنڈ گیلزن کرشن پہنچے گا۔ جرمن کلب کے مینیجر ہورسٹ ہیلڈ (Horst Heldt) نے ریفری کے فیصلے پر کڑی تنقید بھی کی اور کہا کہ ڈچ کلب کا کھلاڑی اپنی غلطی سے گرا تھا اور فاؤل شالکے کے کھلاڑی کا دے دیا گیا جو صحیح نہیں تھا۔ ٹیلی وژن ری پلیز کے مطابق بھی ٹوینٹ کا کھلاڑی اپنی ہی غلطی سے گرا تھا۔

یورپ لیگ ہی میں ایک اور جرمن فٹ بال کلب ہینوور نے اپنا میچ بیلجیم کے شہر لیئیش (Liege) کے اسٹینڈرڈ کلب کے ساتھ دو دو گول سے برابر کھیلا۔ یہ میچ لیئیش میں کھیلا گیا تھا۔ اب بیلجیم کا یہ کلب پندرہ مارچ کو میچ کھیلنے جرمن شہر ہینوور پہنچے گا۔ ہینوور نے 22 ویں منٹ میں برتری حاصل کر لی تھی لیکن اسے میزبان ٹیم نے پانچ منٹ بعد برابر کر دیا۔ لیئیش کی ٹیم نے میچ کے 30 ویں منٹ میں سبقت حاصل کر لی اور یہ پہلے ہاف تک برقرار رہی۔ دوسرے ہاف کے گیارہویں منٹ میں ہینوور نے گول کر کے یہ میچ دوبارہ برابر کر دیا۔

پری کوارٹر فائنل مرحلے کے پہلے راؤنڈ میں برطانیہ کے مشہور فٹ بال کلبوں مانچسٹر سٹی اور مانچسٹر یونائیٹڈ کو شکست کا سامنا رہا۔ مانچسٹر یونائیٹڈ کو ہسپانوی کلب اتھلیٹک نے دو کے مقابلے میں تین گول سے ہرایا جبکہ مانچسٹر سٹی کو پرتگال کے اسپورٹنگ کلب نے ایک گول سے شکست دے دی۔

رپورٹ: عابد حسین

ادارت: مقبول ملک