جارج ٹاؤن انسٹیٹیوٹ کی جانب سے جاری کردہ رپورٹ میں تین مختلف زاویوں سے خواتین کی فلاح اور ان کی زندگی میں بہتری کا تعین لگایا جاتا ہے۔ ان تین زاویوں میں معاشی، سماجی اور سیاسی شمولیت، قانون تک رسائی، اپنے علاقوں، خاندان اور سماجی سطح پر تحفظ کا احساس شامل ہے۔

اس رپورٹ کے مطابق پاکستان کی زیادہ تر خواتین معاشی طور پر خود مختار نہیں ہیں۔ صرف سات فیصد خواتین کے پاس اپنے ذاتی بینک اکاؤنٹ ہیں۔

جارج ٹاؤن انسٹیٹیوٹ کی رپورٹ کے مطابق 34 ممالک میں انصاف سے متعلق مردوں اور خواتین میں مساوات کا تناسب کم ہوا ہے۔ اس حوالے سے سب سے خراب کارکردگی پاکستان کی تھی۔

رپورٹ کے مطابق پاکستان کے 75 فیصد مردوں کی رائے میں ان کے لیے یہ ناقابل قبول ہے کہ خواتین ایسی نوکری کریں جن سے انہیں کوئی معاوضہ وصول ہو۔

رپورٹ میں بتایا گیا ہے کہ سماجی لحاظ سے پاکستان میں خواتین کے تحفظ کے احساس میں کچھ حد تک بہتری آئی ہے۔ پاکستانی خواتین کا کہنا تھا کہ وہ شام کے اوقات میں اپنے محلے میں تنہا چلتے ہوئے غیر محفوظ محسوس نہیں کرتیں۔

اس اشارعیہ میں خواتین کے حوالے سے بدترین ممالک میں پاکستان کے علاوہ لیبیا، عراق، کانگو، جنوبی سوڈان، شام، افغانستان، وسطی افریقی ریاست شامل ہیں۔

اس رپورٹ میں دنیا کے 167 ممالک کا جائزہ لیا گیا تھا۔ خواتین کی فلاح اور ان کی معیار زندگی کے لحاظ سے ناروے دنیا کا سب سے بہترین ملک ہے۔ جرمنی کا نمبر اس فہرست میں سترہواں ہے۔

فیشن میگزین میں یا پھر کسی بیوٹی پروڈکٹ کے اشتہار میں ماڈل کو ایسے ترشے ہوئے بدن کے ساتھ دکھایا جاتا ہے کہ وہ حقیقت سے بہت دور لگتا ہے۔ ’فوٹوشاپ‘ کا استعمال کر کے آنکھیں بڑی بڑی اور ہونٹ بھرے ہوئے دکھائے جاتے ہیں۔

فرانس میں ایک نیا قانون بنایا گیا ہے، جس کے تحت اس طرح کی تصویر کے نیچے صاف صاف لکھا ہونا ضروری ہو گا کہ اس میں ’فوٹوشاپ‘ کے ذریعے تبدیلیاں کی گئی ہیں۔ ایسی تصویر کے نیچے ’ٹچ اپ‘ لکھا جائے گا۔

اس کے علاوہ ماڈل کو ڈاکٹر کے سرٹیفیکیٹ کی ضرورت ہو گی، جس پر لکھا ہو گا کہ وہ صحت مند ہیں اور حد سے زیادہ دبلی پتلی نہیں۔ اس کے لیے ان کے بی ایم آئی (باڈی ماس انڈیکس) کی رپورٹ تیار کی جائے گی۔

بی ایم آئی میں قد کی مناسبت سے وزن کو پرکھا جاتا ہے۔ ساتھ ہی عمر پر بھی توجہ دی جاتی ہے۔ ایک صحت مند شخص کا بی ایم آئی 18 سے 25 کے درمیان ہوتا ہے۔ 18 سے کم کو غذائی قلت کا شکار سمجھا جاتا ہے جبکہ ماڈل گرلز کا بی ایم آئی زیادہ تر 15 سے 16 کے درمیان ہی ہوتا ہے۔

اکثر ماڈل لڑکیوں کو وزن کم کرنے کو کہا جاتا ہے۔ بہت سی لڑکیوں کا وزن محض 40 اور 45 کلو گرام کے درمیان ہوتا ہے، اس کے لیے وہ اکثر خود کو دن بھر بھوکا رکھتی ہیں۔

قانون کی خلاف ورزی کرنے پر ماڈل گرلز کو کام پر رکھنے والی ایجنسی کو سزا ہو سکتی ہے۔ اس میں چھ ماہ کی قید اور پچھتر ہزار یورو تک کا جرمانہ بھی شامل ہے۔ اعداد و شمار بتاتے ہیں کہ فرانس میں خود کو بھوکا رکھنے کی وجہ بیماری کی شکار نوجوان لڑکیوں کی تعداد 30 سے ​​40 ہزار کے درمیان ہے۔

صرف فرانس ہی نہیں، دنیا بھر میں انتہائی پتلی ماڈل نوجوان لڑکیوں کے لیے ایک مثال بنتی جا رہی ہیں۔ انہیں دیکھ کر دیگر لڑکیاں خود بھی ان جیسا بننے کی کوشش کرتی ہیں اور بیمار لگنے لگتی ہیں۔

فرانس سے پہلے اسرائیل اور اٹلی بھی انتہائی دبلی پتلی ماڈل لڑکیوں کو بائی بائی کر چکے ہیں۔ امید ہے کہ باقی کے ملک بھی اس سے سبق لیں گے اور آئندہ خوبصورت بھی انہی ماڈلز کو کہا جائے گا، جو صحت مند بھی ہوں گی۔

نیلام کیے جانے والے بیش قیمت زیورات میں موتیوں سے جڑے نیکلس، ہیرے اور ملکہ کے بالوں کی لٹ والی انگوٹھی شامل ہیں۔ ان زیورات کو تقریباً دو صدیوں کے بعد جنیوا میں قائم ’سدے بیز‘ نیلام گھر میں فروخت کیا جائے گا۔ یہ زیورات فرانسیسی ملکہ کے زیراستعمال رہے تھے۔ سدے بیز کی ترجمان کے مطابق یہ انتہائی تاریخی نوادرات کی نیلامی ہے۔

فرانس کی مشہور ملکہ میری اینٹونیٹ ویانا میں دو نومبر سن 1755 پیدا ہوئی تھیں۔ وہ آسٹریائی ملکہ ماریا تھریسا کی سب سے چھوٹی بیٹی تھیں۔ سن 1793ء میں انقلاب فرانس کے بعد انقلابی عدالت کے فیصلے کے تحت صرف اڑتیس برس کی ملکہ کا سر تن سے جدا کر دیا گیا اور نعش ایک گمنام قبر میں پھینک دی گئی۔ اُن کی شادی فرانسیسی باشاہ لوئی اگسٹ سے ہوئی تھی۔

نیلامی کے لیے میری اینٹونیٹ کے گلے کا آویزہ بھی رکھا گیا ہے۔ اس میں جڑا قدرتی موتی اٹھارہ ملی میٹر لمبا ہے۔ توقع ہے کہ اس کی نیلامی ایک سے دو ملین ڈالر کے درمیان ممکن ہے۔ اس موتی والے آویزے کو فرانسیسی ملکہ نے صرف ایک مرتبہ پہنا تھا۔

نیلامی کے لیے رکھے گئے شاہی زیورات میں ہیرے کا بروچ اور کانوں کے پہننے والی بالیاں بھی شامل ہیں۔ ان زیورات کو نیلام کرنے سے قبل ہانگ کانگ، نیویارک، میونخ اور لندن سمیت دنیا کے کئی شہروں میں نمائش کی گئی تھی تا کہ خریدار نیلامی کے وقت اپنی بولی کا تعین کر سکیں۔

ایک ایسی انگوٹھی بھی نیلام کے لیے موجود ہے، جس پر ملکہ میری اینٹونیٹ کے نام کے ابتدائی حروف ایم اے دکھائی دیتے ہیں اور ان میں گلابی ہیرے جڑے ہیں۔ اس کے علاوہ اسی انگوٹھی میں ملکہ کے بالوں کی ایک لٹ بھی موجود ہے۔ اس وقت یہ تمام زیورات اطالوی شاہی خاندان بوربن پارما کے کنٹرول میں ہیں۔

انقلاب فرانس کے بعد ملکہ میری اینٹونیٹ نے فرار کی کوشش کی تھی۔ اس کوشش سے قبل اپنے زیورات ایک لکڑی کے صندوق میں رکھ کر برسلز روانہ کر دیے تھے، جہاں سے یہ صندوق آسٹریائی بادشاہ کو پہنچا دیا گیا۔ ملکہ کے فرار کا منصوبہ ناکام ہو گیا لیکن اُن کی اکلوتی بیٹی تھریسا کو سن 1795 میں رہا کر دیا گیا اور جب وہ آسٹریا پہنچی تو لکڑی کا صندوق انہیں دے دیا گیا تھا۔

جنیوا کے سدے بیز کے نیلام گھر میں جو تاریخی اشیاء نیلامی کے لیے رکھی ہوئی ہیں، ان میں ملکہ میری اینٹونیٹ کے دوست اور شوہر کے بھائی چارلس دہم کے ملکیتی ہیرے بھی شامل ہیں۔