یورو زون وزرائے خزانہ سے تازہ مذاکرات کو یونانی پارلیمان سے اس بیل آؤٹ پیکج کی منظوری سے نتھی کیا گیا تھا۔ تاہم اس سلسلے میں یونانی پارلیمان میں متضاد نکتہ ہائے نظر دیکھے گئے۔ وزیراعظم الیکسس سپراس نے قانون سازوں کو اس بیل آؤٹ پیکج میں درج سخت ترین بچتی اصلاحات کی شرائط پر رضامند کرنے کے لیے سخت تگ و دو کی۔

دوسری جانب گزشتہ روز بچتی اصلاحات کے مخالفین نے ایتھنز کی سڑکوں پر مظاہرے کیے۔ بتایا گیا ہے کہ مشتعل ہجوم نے پولیس اہلکاروں پر پیٹرول بم بھی برسائے۔

خبر رساں ادارے اے ایف پی کے مطابق الیکسس سِپراس نے ملکی پارلیمان سے اس بیل آؤٹ پیکج کو منظور تو کروا لیا ہے، تاہم ان کی اپنی انتہائی بازو کی جماعت سیریزا پارٹی اس پر خوش نہیں۔ بدھ کی شب اس سلسلے میں ہونے والی ووٹنگ میں پارلیمان میں 149 نشستوں پر براجمان سیریزا پارٹی کے 32 ارکان پارلیمان نے اس بیل آؤٹ کے خلاف ووٹ دیا۔ اے ایف پی کے مطابق تاہم پارلیمان کی اکثریت نے اس بل کو منظور کر لیا ہے۔ اس سلسلے میں ہونے والی ووٹنگ میں 300 رکنی یونانی پارلیمان میں 229 قانون سازوں نے اس بیل آؤٹ کے حق میں ووٹ ڈالا جب کہ چھ نے ووٹ ڈالنے سے اجتناب برتا۔

اس بیل آؤٹ کے نتجے میں یونانی حکومت کو ٹیکسوں کی وصولی، پینشن اور ملازمین کے لیے ضوابط کے شعبوں میں بڑی اصلاحات لائی جائیں گی۔

86 ارب یورو کے تیسرے بیل آؤٹ پیکج کے لیے سخت مذاکرات سے قبل یورو زون ممالک کی جانب سے شرط رکھی گئی تھی، کہ اس بیل آؤٹ معاہدے کی توثیق پہلے یونانی پارلیمان کرے۔

یورو زون ممالک کے وزرائے خزانہ اب جمعرات کو اس سلسلے میں نئے اقدامات تجویز کر رہے ہیں، جب کے یورپی سینٹرل بینک کی گورننگ کونسل بھی یونانی بینکوں کو گرنے سے بچانے کے لیے نئے لائحہ عمل پر بات چیت کرے گی۔

اے ایف پی کے مطابق یورپی حکومتیں البتہ اس بات پر اب بھی منقسم ہیں کہ یونان کی مدد کن طریقوں سے کی جائے تاکہ وہ قلیل المدتی بنیادوں پر سرمایے کی تنگی پر قابو پا سکے، تاوقت کہ یورو زون سے اس کی بیل آؤٹ ڈیل حتمی شکل پا جائے۔ اس بیل آؤٹ کے حتمی شکل تک پہنچنے میں اگلے کچھ ہفتے لگ سکتے ہیں۔ جرمن پارلیمان اس سلسلے میں کل جمعے کے روز منظوری کے لیے اجلاس منعقد کر رہی ہے۔