اس زوال کا بنیادی سبب اشتہارات سے حاصل ہونے والی آمدنی میں نمایاں کمی ہے جو کہ 60 فیصد کے قریب گر چکی ہے۔ اس کے علاوہ اب مالیاتی ادارے بھی میڈیا کمپنیوں کو سازگار شرائط پر قرض دینے کو تیار نہیں ہیں۔

ایتھنز میں صحافیوں کی تنظیم ای ایس آئی ای اے کے صدر دیمترس تریمس نے اس صورت حال کا نقشہ کھینچتے ہوئے ڈی پی اے کو بتایا، ’’ہم آہستہ آہستہ موت کی جانب بڑھ رہے ہیں۔‘‘

اس بحران کا شکار ہونے والا پہلا اخبار ایتھنز کا قدامت پسند روزنامہ Apogevmatini تھا جس نے نومبر 2010 ء میں اپنے دیوالیہ پن اعلان کرتے ہوئے اشاعت بند کر دی تھی۔

اب بائیں بازو کی طرف جھکاؤ رکھنے والا یونان کا ایک اور اہم اخبار Eleftherotypia بھی مالی مشکلات سے دوچار ہو گیا ہے اور اس کی اشاعت بھی رک گئی ہے۔

اس اخبار کے ادارتی عملے کو اگست کے مہینے سے تنخواہیں ادا نہیں کی گئیں اور کارکنوں نے اس تاخیر کے خلاف کئی ہفتوں سے ہڑتال بھی کر رکھی ہے۔ اخبار کے مالکان کا کہنا ہے کہ انہوں نے اپنے ادارے کے دیوالیہ ہو جانے سے درخواست دے رکھی ہے۔

ایک نجی ٹیلی وژن چینل آلٹر نے بھی دسمبر کے وسط میں اپنی نشریات بند کر دی تھیں۔ اس چینل کے ملازمین کو بھی گزشتہ کئی ماہ سے تنخواہوں کی ادائیگی نہیں کی گئی اور وہ بھی ہڑتال پر ہیں۔

تریمس نے کہا، ’’یہ واقعات آنے والے مشکل دور کی عکاسی کرتے ہیں۔ اس بحران سے صرف ہم ہی متاثر نہیں ہوئے بلکہ معلومات کی کمی سے معاشرے کو بھی اس کے اثرات برداشت کرنا پڑیں گے۔‘‘

ذرائع ابلاغ کے بعض دیگر اداروں پر بھی مالیاتی دباؤ کی علامات دکھائی دینے لگی ہیں۔ بیشتر نجی ٹیلی وژن چینل اب اپنی نشریات میں گزشتہ ایک دہائی کے دوران بنائی گئی پرانی سیریز دکھا رہے ہیں اور انہوں نے نئے پروگرام تیار کرنا بند کر دیے ہیں۔

ایتھنز سے موصولہ اطلاعات کے مطابق ریڈیو اسٹیشنوں کی حالت بھی انتہائی پتلی ہو چکی ہے۔ حتٰی کہ سرکاری نشریاتی ادارے ای آر ٹی میں بھی روزانہ کئی گھنٹے ہڑتال کی جا رہی ہے کیونکہ اس کے ایک ٹیلی وژن چینل اور کئی علاقائی ریڈیو اسٹیشنوں کو بند کرنے کا عندیہ دیا جا چکا ہے۔

یہ بحران یونان میں ذرائع ابلاغ کے شعبے میں 20 سال تک ہونے والی مسلسل ترقی کے بعد آیا ہے جس میں آمدنی کا بڑا ذریعہ سرکاری اشتہارات تھے۔

جنوبی یورپ کے اس ملک کی آبادی ایک کروڑ دس لاکھ نفوس پر مشتمل ہے اور وہاں ذ‌رائع ابلاغ کے بہت سے ادارے موجود ہیں، تاہم لگتا ہے کہ اب ان میں سے بیشتر مستقل طور پر بند ہو جائیں گے۔

یونان میں اس وقت کھیلوں کے آٹھ اخبارات اور سات نجی ٹیلی وژن اسٹیشن ہیں۔ اس کے علاوہ سو سے زائد مقامی ٹیلی وژن اسٹیشن اور تیس ریڈیو اسٹیشن بھی موجود ہیں۔

رپورٹ: حماد کیانی

ادارت: مقبول ملک