آج پیر کے روز بیلجیم کے دارالحکومت برسلز میں انٹرنیشنل مانیٹری فنڈ کے ماہرین اور یورو زون کے وزرائے خزانہ یونان کے لیے بیل آؤٹ پیکج کی اگلی قسط جاری کرنے کے بارے میں میٹنگ کر رہے ہیں۔ لیکن ریلیز سے قبل یہ بھی طے کیا جائے گا کہ آیا یونان کو دیے گئے قرضوں کے کچھ حصوں کو معاف کر دیا جائے یا نہیں۔ کچھ دن قبل یونان کے لیے بیل آؤٹ پیکج کی اگلی قسط کی ریلیز پر فیصلہ نہیں ہو سکا تھا۔

گزشتہ دو ہفتوں کے دوران یونانی قرضوں کو کم کرنے کے حوالے سے کوئی حل تلاش کرنے کے سلسلے میں یورو زون کے وزرائے خزانہ اور ان کے معاونین کی کئی ملاقاتیں ہو چکی ہیں۔ عالمی مالیاتی ادارہ اور یورو زون کے وزراء قرضوں کے حجم میں کمی کے بارے میں کسی نتیجے پر پہنچے بغیر بیل آؤٹ پیکچ کی اگلی اقساط جاری کرنے میں قدرے ہچکچاہٹ کا مظاہرہ کر رہے ہیں۔ اقساط کے اجراء کے حوالے سے ایتھنز حکومت نے تمام شرائط کو بظاہر پورا کر دیا ہے۔

اس سلسلے میں فرانس اور اٹلی کا خیال ہے کہ سالاتہ شرح نمُو دیکھتے ہوئے اس میں تیس پوائنٹس کی کمی کی جائے جبکہ بشمول جرمنی اور بعض دیگر اقوام کا خیال ہے کہ یہ سالانہ شرح نمُو کے تناظر میں نوے پوائنٹس کم کی جائے۔ اس مناسبت سے یہ بھی کہا جا رہا ہے کہ یونان کو دیے جانے والے قرضوں پر لگائے گئے انٹرسٹ کو اگر مؤخر کر دیا جائے توکیا یونانی اقتصادیات کو ٹھہراؤ حاصل ہو سکے گا؟۔ تازہ ترین اعدادوشمار کے مطابق سن 2020 میں یونانی قرضوں کے حجم میں کمی یقینی خیال کی جا رہی ہے اور یہ سطح سالانہ شرح نمُو کے مقابلے میں موجودہ 190پوائنٹس کی جگہ 125 پوائنٹس پر آ جائے گی۔

یورپی مرکزی بینک اس پر تیار ہے کہ وہ یونانی حکومت کے مالیاتی بانڈز پر حاصل ہونے والے منافع سے دست بردار ہو سکتا ہے اور یہ امر بھی اہم ہے کہ کئی یورپی اقوام کے مرکزی بینکس اس منافع کو چھوڑنے کے حامی دکھائی نہیں دیتے۔ ان بینکوں میں جرمنی کا مرکزی بینک بھی شامل ہے۔ یونانی اقتصادیات کے حوالے سے ایک تازہ رپورٹ یہ ظاہر کرتی ہے کہ سن 2020 تک یونانی قرضوں کے حجم میں 120 پوائنٹس کی کمی بعید از امکان ہے۔ عالمی مالیاتی ادارہ (IMF) اس صورت حال کو دیکھتے ہوئے یورو زون کو مشورہ دے رہا ہے کہ وہ یونانی قرضوں کے بعض حصوں کو معاف کر دے۔

ah / ai ( Reuters)