یوکرائن نے روس کی طرف سے امدادی سامان سے لدے ٹرکوں کے قافلے کو مشرقی یوکرائن بھیجنے کے فیصلے کو شدید تنقید کا نشانہ بنایا ہے۔ یوکرائن نے امدادی سامان بھیجنے کے روسی فیصلے کو روس نواز باغیوں کی مدد کی ایک مایوس کن کوشش قرار دیتے ہوئے اعلان کیا ہے کہ اس قافلے کو یوکرائن کی حدود میں داخل نہیں ہونے دیا جائے گا۔

یوکرائنی وزیر اعظم آرسینی یاٹسینی یُک نے آج بدھ کے روز ایک حکومتی میٹنگ کے دوران کہا، ’’پہلے انہوں نے ٹینک بھیجے، گراڈ میزائل اور راہزن بھیجے جو یوکرائنی لوگوں پر حملے کر رہے ہیں اور پھر پانی اور نمک بھیج دیا۔‘‘

یوکرائنی وزیراعظم کے یہ الفاظ دراصل کییف اور دیگر مغربی ممالک میں پائے جانے والے شکوک وشبہات کے عکاس ہیں کہ یوکرائنی کی سر زمین پر امدادی قافلہ بھیجنے کا مقصد دراصل روس نواز باغیوں کی مدد کرنا ہو سکتا ہے جو یوکرائنی حکومتی فورسز کے سامنے اپنی مزاحمت کھوتے جا رہے ہیں۔

تاہم ماسکو حکام کے مطابق اس قافلے کے ذریعے یوکرائن کے مشرقی علاقوں کے رہائشیوں کو وہ دو ہزار ٹن امدادی سامان پہنچایا جائے گا جو ماسکو اور اس کے نواحی علاقوں کے لوگوں نے جمع کیا۔

خبر رساں ادارے روئٹرز کے مطابق سامان سے لدے 280 ہیوی ٹرک دارالحکومت ماسکو کے علاقے سے منگل کے روز روانہ ہوئے اور قریب 500 کلومیٹر کا سفر طے کرنے کے بعد آج روس کے جنوب مغری شہر وورونیش پہنچے ہیں جہاں انہیں ایئر بیس پر ٹھہرایا گیا ہے۔

دوسری طرف اقوام متحدہ کے انسانی حقوق کے ادارے کی خاتون ترجمان سِیسی پُوژی Cecile Pouilly نے کہا ہے کہ 10 اگست تک ہلاکتوں کی اندازہ لگائی گئی تعداد 2086 تک پہنچ گئی تھی۔ جبکہ 26 جولائی تک یہ تعداد 1129 تھی۔ ہلاک ہونے والوں کی اس مجموعی تعداد میں یوکرائنی فوجی، باغی گروپوں کے ارکان اور عام شہری شامل ہیں۔ پوژی نے خبر رساں ادارے روئٹرز کو ایک سوال کے جواب میں بتایا کہ ہلاکتوں کی تعداد میں یہ اضافہ دراصل وہاں تیزی سے خراب ہوتی ہوئی صورتحال کو ظاہر کرتا ہے۔

یوکرائن کی طرف سے منگل 12 اگست کو کہا گیا تھا کہ ٹرکوں کے قافلے کے ذریعے بھیجا گیا امدادی سامان یوکرائن کی سرحد پر اتار کر ریڈ کراس کے نمائندوں کی نگرانی میں دوسرے ٹرکوں پر منتقل کیا جائے گا۔ یورپی یونین کے مطابق اس سامان میں موجود اشیاء کی پڑتال کی جائے گی۔ تاہم روسی وزیر خارجہ سیرگئی لاروف کی طرف سے کہا گیا ہے کہ امدادی سامان کو یوکرائن کے ٹرکوں میں منتقل نہیں کیا جا سکتا۔

کییف حکومت کی طرف سے روس پر الزام عائد کیا جاتا ہے کہ وہ یوکرائن کے مشرقی علاقوں میں حکومت کے خلاف بغاوت کرنے والوں کو اسلحہ اور تربیت فراہم کر رہا ہے۔ یوکرائنی حکومت کے مطابق اس اسلحے میں ٹینک، میزائل اور دیگر ہتھیار شامل ہیں۔ تاہم روس کی طرف سے اس الزام کی تردید کی جاتی ہے۔