پارلیمنٹ نے یہ بِل جمعرات کو منظور کیا گیا، جس کے بعد اپوزیشن نے سخت ردِ عمل ظاہر کیا ہے۔ خبر رساں ادارے روئٹرز کے مطابق اس کے نتیجے میں عوام میں پائی جانے والی تشویش میں بھی اضافہ ہوا ہے، جو پہلے ہی سڑکوں پر نکلے ہوئے ہیں۔

پارلیمنٹ میں صدر یانوکووچ کی ریجنز پارٹی اور ان کے اتحادیوں نے اس قانون کی حمایت کی تھی۔ اس قانون میں روس کی طرز پر غیر ملکی این جی اوز کی رجسٹریشن کا مؤقف بھی اختیار کیا گیا ہے۔ ساتھ ہی یہ بھی کہا گیا ہے کہ ان تنظیموں کو اپنے منافع پر ٹیکس ادا کرنا چاہیے۔

قانون کے مطابق بیرون ملک سے مالی مدد حاصل کرنے والی وہ غیرسرکاری تنظیمیں جو یوکرائن میں سیاسی سرگرمیوں میں حصہ لیں گی، انہیں ’غیر ملکی ایجنٹ‘ قرار دیا جائے گا۔ اس قانون کے تحت کھلے مقامات پر بلا اجازت کیمپ، اسٹیج یا ساؤنڈ سسٹم لگانا بھی غیر قانونی ہو گا۔ خلاف ورزی کرنے والوں کو 640 ڈالر کے برابر تک جرمانے یا پندرہ روز تک کی سزائے قید کا سامنا ہو سکتا ہے۔

اس قانون کا مسودہ ایک سو سے زائد صفحات پر مشتمل ہے۔ روئٹرز کے مطابق اس کا مقصد احتجاجی مظاہروں پر قابو پانا دکھائی دیتا ہے جو دارالحکومت کییف اور دیگر شہروں میں گزشتہ برس نومبر سے جاری ہیں۔

اُس وقت صدر وکٹر یانُوکووِچ نے یورپی یونین کے ساتھ وسیع تر تعلقات کے لیے طویل کوششوں کے بعد باقاعدہ معاہدے سے انکار کر دیا تھا۔ اس کے بجائے وہ روس کے ساتھ تعلقات پر توجہ دے رہے تھے۔ یوکرائن کے اُن شہریوں نے حکومت کے اس فیصلے پر ناگواری ظاہر کی تھی جو یورپی یونین کے ساتھ قریبی تعلق کے خواہاں ہیں۔ یورپ نواز شہری اپنے مطالبات لیے سڑکوں پر نکل آئے تھے۔

اس سابق سوویت جمہوریہ میں 2004ء کے نارنجی انقلاب کے بعد ہونے والے یہ سب سے بڑے مظاہرے تھے، جو حکومت کے لیے بھی خاصی پریشانی کا باعث بنے۔ حکومت نے مظاہرین کو خبردار بھی کیا تھا۔ حکام کا یہ بھی کہنا تھا  کہ مظاہروں کے ذریعے اپوزیشن رہنما اقتدار میں آنے کی کوشش کر رہے ہیں اور ان کے اس مبینہ عمل کی تفتیش کی جائے گی۔ مظاہرین کو بھی خبردار کیا گیا تھا کہ انہیں مجرمانہ کارروائیوں میں ملوث ہونے کے الزامات کا سامنا کرنا پڑ سکتا ہے۔

تاہم اس احتجاج کا سلسلہ تاحال جاری ہے، البتہ سڑکوں پر پہلے کی نسبت مظاہرین کی تعداد کم رہ گئی ہے۔ اس کے باوجود سینکڑوں افراد بدستور کییف کے آزادی چوک پر ڈیرا ڈالے ہوئے ہیں۔ مظاہرین سٹی ہال جیسی سرکاری عمارتوں پر بھی قبضہ کیے ہوئے ہیں۔  گزشتہ اتوار کو دارالحکومت میں صدر یانوکووچ کے خلاف مظاہرے میں کم از کم 50 ہزار افراد شریک ہوئے تھے۔