یوکرائن میں صدر وکٹور یانوکووچ کے غیر اعلانیہ رخصت ہو جانے کے بعد عبوری صدر اولیکزانڈر ترشینوف کا کہنا ہے کہ نئی حکومت کا قیام جمعرات کے روز مکمل ہو جائے گا کیونکہ اس حوالے سے مشاورت کا عمل ابھی مکمل نہیں ہوا ہے۔ ترشینوف کا بیان پارلیمنٹ کی جانب سے نئے وزیراعظم کے انتخاب کو جمعرات تک ملتوی کرنے کے بعد سامنے آیا۔ مبصرین کا خیال ہے کہ نئی یونٹی حکومت کا قیام کییف کے عبوری حکومتی حلقے میں پیدا سیاسی تناؤ اور اقتصادی بےچینی کا مظہر ہے۔ یوکرائنی پارلیمنٹ آج منگل کے روز نئے وزیراعظم کا انتخاب کرنے والی تھی۔

عبوری صدر اولیکزانڈر ترشینوف نے پیر کے روز کیتھرین ایشٹن سے بھی ملاقات کی۔ اس ملاقات میں ترشینوف نے واضح کیا کہ وہ یورپ کے ساتھ انضمام کے راستے کو اپنانے کی کوشش کریں گے تاکہ یورپی یونین سے مالی معاونت حاصل کی جا سکے۔ ایسا خیال کیا جا رہا ہے کہ جن حالات میں روس نواز صدر وکٹور یانوکووچ کو منصب صدارت چھوڑ کر جانا پڑا ہے، اُس کے بعد ماسکو حکومت طے شدہ ڈیل کے تحت پندرہ بلین ڈالر کے بیل آؤٹ پیکج سے ہاتھ کھینچ سکتی ہے۔ اُدھر نیٹو کے یورپ میں سپریم کمانڈر جنرل فلیپ برِیڈ لَو نے روسی افواج کے چیف آف جنرل اسٹاف جنرل ویلیری گیراسیموف کے ساتھ یوکرائن کی سلامتی کے معاملات پر گفتگو کرتے ہوئے طے کیا ہے کہ جو بھی تبدیلیاں پیدا ہوں گی، ان سے ایک دوسرے کو آگاہ رکھا جائے گا۔

دوسری جانب یورپی یونین کی خارجہ امور کی چیف کیتھرین ایشٹن نے نئی عبوری حکومت پر زور دیا ہے کہ وہ اصلاحاتی پروگرام کے پلان کو جامع شکل دے تاکہ یونین اُس کی کمزور اور علیل اقتصادیات کے لیے مالی امداد پر غور شروع کر سکے۔ اِس دوران یوکرائن کے عبوری وزیر خزانہ یوری کولوبوف کا کہنا ہے کہ اُن کے ملک کی اقتصادیات کو مالی معاونت کی اشد ضرورت ہے۔ مبصرین کے مطابق یوکرائن کی معیشت کو نومبر سے جاری مظاہروں نے انتہائی کمزور کر دیا ہے۔ کولوبوف کا کہنا ہے کہ یوکرائن کو اگلے سال کے آخر تک ہر صورت میں پچیس بلین یورو تک کی مالی امداد درکار ہو گی۔ یوکرائنی وزیر خزانہ نے اس صورت حال سے نمٹنے کے لیے انٹرنیشنل ڈونرز کانفرنس کی تجویز پیش کی ہے۔ یورپی یونین کے موجودہ ششماہی کے لیے صدر ملک یونان نے بھی یوکرائن کو دیوالیہ پن اور اقتصادی مشکلات سے بچانے کے لیے ڈونرز کانفرنس تجویز سے اتفاق کیا ہے۔

یوکرائن کے مرکزی الیکشن کمیشن نے اپنی ویب سائٹ پر پچیس مئی کے صدارتی انتخابات کے لیے نظام الاوقات جاری کر دیا ہے۔ الیکشن میں حصے لینے والے امیدوار چار اپریل تک اپنا نام رجسٹر کروا سکتے ہیں۔ ایک روسی نیوز ایجنسی آر آئی اے نوووستی کے مطابق الیکشن کمیشن کے سربراہ نے کہا ہے کہ قبل از وقت ہونے والے صدارتی الیکشن کے لیے کسی امیدوار کو بظاہر کسی قانونی پیچیدگی کا سامنا نہیں ہو سکتا۔ خیال کیا جا رہا ہے کہ جیل سے رہا ہونے والی یورپ نواز خاتون سیاستدان اور سابق وزیر اعظم یولیا ٹیمو شینکو صدارتی امیدوار بن سکتی ہیں۔