مغربی دفاعی اتحاد نیٹو کے سیکرٹری جنرل آندرس فوگ راسموسین نے جزیرہ نما کریمیا کی صورت حال پر روس کو متنبہ کیا ہے کہ وہ یوکرائنی بحران کے دوران کریمیا میں کشیدگی کو بڑھانے سےگریز کرے۔ موجودہ صورت حال پر راسموسین نے تشویش کا اظہار کیا ہے۔ اپنے ٹویٹر پر جاری میسج میں نیٹو کے سیکرٹری جنرل نے روس پر زور دیا ہے کہ وہ کوئی ایسا ایکشن نہ لے کہ جس کی وجہ سے علاقے میں کشیدگی کو فروغ اور غلط فہمی میں اضافہ ہو۔ نیٹو کے سیکرٹری جنرل نے مغربی دفاعی اتحاد کے یوکرائن کمیشن پر بھی واضح کیا کہ کریمیا میں جو صورت حال پیدا ہے وہ انتہائی خطرناک اور غیر ذمہ داری کی عکاس ہے۔ راسموسن نے فریقین کو کشیدگی بڑھانے سے اجتناب کو مشورہ دیا ہے۔

روسی نیوز ایجنسی انٹرفیکس نے آج صبح رپورٹ کیا تھا کہ روس کے حامی مسلح افراد نے یوکرائن کے علاقے جزیرہ نما کریمیا کی مقامی حکومت کے صدر دفتر پر قبضہ کر لیا ہے۔ کریمیا کے نیم خود مختار علاقے کے مرکزی شہر سِمفیروپول (Simferopol) میں مقامی حکومت کا ہیڈکوارٹرز دو عمارتوں پر مشتمل ہے اور ان پر روس کے حامی مسلح افراد قابض ہو کر روسی پرچم کو لہرا دیا۔ مقامی پولیس نے مقبوضہ عمارت کو چاروں جانب سے گھیر رکھا ہے۔ یوکرائن کے عبوری وزیر داخلہ ارسن اواکوف نے بھی مقامی پولیس کو چوکس رہنے کا حکم دیا ہے۔ مقامی حکومت کی بلڈنگ کے باہر گزشتہ روز روس نواز اور کییف کے حامیوں کی مڈبھیڑ ہوئی تھی۔ یہ امر اہم ہے کہ مقامی تاتار نسل کے لوگ موجودہ یورپی نواز حکومت کی حمایت کر رہے ہیں۔

کریمیا میں پیدا شدہ صورت حال کے تناظر میں یوکرائن کی عبوری حکومت نے سکیورٹی فورسز کو بھی چوکس کر دیا ہے۔ عبوری صدر اولیکزانڈر ترشینوف نے کریمیا میں روسی نیول بیس میں موجود روسی افواج سے کہا ہے کہ وہ اپنے بیس سے باہر نکلنے کی کوشش نہ کریں اور اگر وہ باہر آئیں تو اِسے جارحیت تصور کیا جائے گا۔ یوکرائنی دارالحکومت کییف میں عبوری حکومت نے روسی سفیر کو طلب کر کے مشاورت کا عمل شروع کرنے کی درخواست کی ہے۔ حکومتی بیان میں کہا گیا کہ عبوری سفیر آندری ووروبیئوف کو ایک تحریر شدہ خط دیا گیا اور اس میں مشاورت شروع کرنے کے علاوہ کریمیا کے بندرگاہی مقام سیواسٹوپول (Sevastopol) پر واقع روسی نیول بیس کی افواج کو بیس کے اندر ہی رہنے کا کہا گیا ہے۔

روس کی وزارت خارجہ کی جانب سے جاری ہونے والے بیان میں کہا گیا کہ اپنے ہم وطنوں کے حقوق کا دفاع انتہائی پرعزم اور قوت کے ساتھ کیا جائے گا۔ خیال کیا گیا ہے کہ روسی وزارت خارجہ کا یہ بیان یوکرائن کے علاقے کریمیا میں پیدا صورت حال کے بعد جاری کیا گیا ہے۔ دوسری جانب روسی صدر وبادیمیر پوٹین کی ہدایت پر قبل از وقت وسطی اور مغربی علاقوں میں متعین روسی افواج کے معائنے کی مشقوں میں بحری، بری اور فضائی افواج شریک ہیں۔ ان مشقوں میں 90 جنگی طیارے، ڈیڑھ لاکھ پیدل فوجی اور 80 کے قریب بحری جہاز شامل ہیں۔ خصوصی انسپیکشن کی مشقیں کل بدھ سے شروع ہو گئی ہیں۔ کریمیا کے حوالے سے ایک اور پیش رفت یہ ہے کہ روسی وزارت دفاع نے مغربی علاقے میں جنگی طیاروں کو چوکس رہنے کا حکم دیا ہے۔ روس کے مغربی علاقے کی سرحد یوکرائن سے متصل ہے۔

یوکرائن کے حوالے سے یہ بھی اہم ہے کہ پارلیمنٹ سے معزول ہونے والے صدر وکٹور یانوکووچ نے روس سے اپیل کی ہے کہ انہیں ملک کے انتہا پسندوں سے بچایا جائے۔ حکومتی ذرائع کے مطابق روس نے اُن کی درخواست کو قبول کر لیا ہے۔ وکٹور یانووکوچ کو روسی دارالحکومت ماسکو کے یوکرائنا ہوٹل کی لابی میں دیکھا گیا تھا اور اب وہ کریملن کے نواح میں واقع Barvikha سینیٹوریم میں قیام پذیر ہو گئے ہیں۔ یہ سینیٹوریم روسی صدر کی انتظامیہ کی نگرانی میں ہے۔ یانوکووچ نے گزشتہ ہفتے کے دوران مسلسل عوامی مظاہروں کے بڑھتے دباؤ کے بعد کییف میں واقح صدارتی رہائش گاہ کو خیر باد کہہ دیا تھا۔ جمعرات کے روز جاری ہونے والے بیان میں انہوں نے خود کو بدستور یوکرائن کا جائز سربراہ قرار دیا ہے۔