یوکرائن کے بحران پر بات چیت کے لیے امریکی وزیر خارجہ جان کیری نے اپنے روسی ہم منصب سیرگئی لاوروف سے فرانس کے دارالحکومت پیرس میں ملاقات کی۔ اس موقع پر برطانیہ، فرانس اور یوکرائن کے وزرائے خارجہ بھی موجود تھے تاہم خبر رساں ادارے روئٹرز کے مطابق لاوروف نے یوکرائن کے اپنے ہم منصب کو تسلیم کرنے سے انکار کر دیا۔

کیری اور لاوروف کے درمیان جمعرات کو اٹلی کے دارالحکومت روم میں بھی ایک ملاقات متوقع ہے۔ بدھ کو پیرس میں بات چیت کے بعد کیری کا کہنا تھا: ’’ایسا مت سمجھیں کہ ہم نے کوئی سنجیدہ بات چیت نہیں کی جس کے نتیجے میں بحران کے حل کے لیے تخلیقی اور مناسب طریقے سامنے آ سکتے ہیں۔‘‘

جان کیری کا مزید کہنا تھا: ’’صورتِ حال بہت خراب ہے اور تنازعہ گھمبیر ہے، میرا نہیں خیال کہ اِن حالات میں ہم میں سے کسی نے بھی یہاں آنے سے پہلے یہ سوچا ہو گاکہ یہ مسئلہ آج یہیں حل کر لیا جائے گا۔‘‘

قبل ازیں روس نے مغربی ملکوں کا یہ مطالبہ ردّ کر دیا تھا کہ یوکرائن کے شورش زدہ علاقے کریمیا سے اس کی فوجیں واپس اپنے اڈوں پر لوٹ جائیں۔

اُدھر برسلز میں مغربی دفاعی اتحاد نیٹو نے روس کے ساتھ تعاون محدود کرنے کا اعلان کیا ہے۔ نیٹو کا کہنا ہے کہ یوکرائن کی نئی قیادت کے ساتھ تعاون کیا جائے گا۔

اس کے ساتھ ہی یورپی یونین نے یوکرائن کے معزول صدر وکٹر یانوکووچ سمیت 18 افراد کی جائیدادیں منجمد کرنے کا اعلان کیا ہے۔ خبر رساں ادارے ڈی پی اے کے مطابق ان پر یوکرائن کے ریاستی فنڈز میں خردبرد کا الزام ہے۔

خبررساں ادارے اے ایف پی نے نیویارک میں سفارت کاروں کے حوالے سے بتایا ہے کہ یوکرائن کے بحران پر غور کے لیے اقوام متحدہ کی سلامتی کونسل کا ایک اجلاس جمعرات کو ہو رہا ہے۔ انہوں نے بتایا کہ اس موضوع پر سلامتی کونسل کا یہ چوتھا مشاورتی اجلاس ہو گا جس کے لیے اس کے پندرہ رکن ملکوں کے سفارت کار عالمی وقت کے مطابق شام ساڑھے سات بجے ملاقات کریں گے۔

اس حوالے سے سلامتی کونسل کا گزشتہ اجلاس پیر کو ہوا تھا۔ اس وقت روس نے شرکاء کو بتایا تھا کہ وکٹر یانوکووچ نے یوکرائن میں امن و امان کے لیے ماسکو حکومت سے وہاں اپنی افواج روانہ کرنے کی درخواست کی ہے۔

خیال رہے کہ روس سلامتی کونسل کا مستقل رکن ملک ہے اور اسے کسی بھی قرارداد کو روکنے کے لیے ویٹو کا حق حاصل ہے۔