یورپی یونین کی برسلز میں منعقدہ سربراہ کانفرنس میں روس کے خلاف مزید پابندیوں کا فیصلہ کیا گیا ہے۔ جمعہ اکیس مارچ کو ختم ہونے والی اس دو روزہ سربراہ کانفرنس میں یورپی یونین نے کریمیا میں روسی اقدام کے خلاف ایک تعزیری اقدام کے طور پر روس کے ساتھ اپنی اگلی سربراہ کانفرنس منسوخ کرنے کا بھی اعلان کیا۔

روس نے بحیرہء اسود کے جزیرہ نما کریمیا پر اپنی عسکری قوت بڑھانا شروع کر دی ہے۔ بدھ اُنیس مارچ کو روس نواز قوتوں نے یوکرائن کے کئی ایک فوجی اڈوں پر کنٹرول حاصل کر لیا، جیسے کہ مثلاً بندرگاہی شہر سیواستوپول میں، جہاں یہ تصویر اتاری گئی۔

ایک جانب روسی فوجی پیریوالنوئے میں واقع پوکرائن کے فوجی اڈے میں داخل ہو رہے تھے، دوسری طرف روسی آئینی عدالت کریمیا کو وفاق روس کا حصہ بنانے کے معاہدے کو آئین سے ہم آہنگ قرار دے رہی تھی۔ بین الاقوامی سطح پر اس معاہدے کو تسلیم نہیں کیا جا رہا تاہم روسی صدر ولادیمیر پوٹن نے اس معاہدے پر اٹھارہ مارچ منگل کو ہی اپنے دستخط ثبت کر دیے تھے۔ روسی پارلیمان کے دونوں ایوان بھی اس کی توثیق کر چکے ہیں۔

خبر رساں اداروں کے مطابق یوکرائن کے ایک میجر نے یہ بتایا کہ ’روسی فوجی یہاں پہنچ گئے اور اُنہوں نے ہم سے یہ اڈہ چھوڑ دینے کا مطالبہ کیا‘۔ اس تصویر میں ایک فوجی افسر نوووسیرنے کے اڈے سے جاتا نظر آ رہا ہے۔ اگرچہ یوکرائن نے کریمیا سے اپنے فوجی واپس بلانے کا اعلان کیا ہے لیکن کہا ہے کہ فوج کو چوکنا رہنے کا حکم دے دیا گیا ہے۔

اٹھارہ مارچ کو ولادیمیر پوٹن نے کریملن کے شاندار گیورگ ہال میں ایوانِ زیریں دُوما کے نمائندوں اور روسی وفاق کونسل سے خطاب کرتے ہوئے کریمیا کو روس کا ’اٹوٹ انگ‘ قرار دیا اور مغربی دنیا پر الزام عائد کیا کہ اُس نے یوکرائن میں ’ایک سرخ لائن‘ عبور کی ہے۔

پوٹن کے بیانات کے فوراً بعد عملی اقدامات شروع کر دیے گئے۔ کریملن میں ایک شاندار تقریب میں روس میں کریمیا کی شمولیت کے معاہدے پر دستخط ہوئے۔ اس تصویر میں روسی صدر ولادیمیر پوٹن کے ساتھ ساتھ کریمیا کی ماسکو نواز حکومت کے سربراہ سیرگئی آکسیونوف (انتہائی بائیں جانب)، کریمیا کی پارلیمان کے ترجمان ولادیمیر کونسٹانٹینوف (بائیں سے دوسرے) اور سیواستوپول کے میئر الیکسی شالی (دائیں) نظر آ رہے ہیں۔

کریمیا میں ایک ساتھ مایوسی بھی ہے اور جشن بھی۔ جہاں یوکرائن کے فوجی اور اُن کے اہلِ خانہ اس جزیرہ نما سے رخصت ہو رہے ہیں، وہاں کریمیا کے دیگر باسی روسی کے ساتھ الحاق کا خیر مقدم کر رہے ہیں۔ سیواستوپول میں جمع ایک روس نواز شہری نے کہا، ’مجھے یقین ہے کہ ہماری زندگی بہتر ہو جائے گی‘۔

کریمیا میں سینکڑوں افراد نے کریمیا کو روس کا حصہ بنانے سے متعلق پوٹن کی تقریر کو سنا اور خوشی اور جوش و جذبے کے ساتھ تقریر کے بعد ہونے والے آتش بازی کے مظاہرے کو دیکھا۔ اس تصویر میں لوگ کریمیا کے شہر زیمفروپول میں بڑی اسکرین پر یہ مناظر دیکھ رہے ہیں۔ اتوار سولہ مارچ کو ہونے والے ریفرنڈم میں کریمیا کے 97 فیصد شہریوں نے روس کے ساتھ الحق کے حق میں رائے دی تھی۔

پوٹن نے کریمیا میں پیش قدمی کرتے ہوئے غالباً روسی عوام کے ایک حصے کے دلی خواہش پوری کر دی ہے۔ قوم کے نام پوٹن کے خطاب کے بعد متعدد شہروں میں اُن کے لاکھوں حامی جشن مناتے ہوئے سڑکوں پر نکل آئے۔ ماسکو میں اتری اس تصویر میں بھی پوٹن کے حامی جشن مناتے نظر آ رہے ہیں۔

یوکرائن کے دارالحکومت کییف کا مرکزی علاقہ ’میدان‘ گزشتہ کئی مہینوں سے صدر وکٹر یانوکووچ کی حکومت کے خلاف جدوجہد کا مرکز بنا رہا۔ اُس روز بھی، جس روز کریمیا کی یوکرائن سے علیحدگی یقینی نظر آ رہی تھی، اس مقام پر لوگ جمع تھے۔

’میدان‘ میں چند مہینے پہلے کا ایک منظر، جس میں ’یورپی مستقبل کے لیے‘ نامی تحریک کے کارکن یورپی یونین میں یوکرائن کی شمولیت کے موضوع پر ایک ریفرنڈم کا مطالبہ کر رہے تھے۔ اب یہ منزل قریب آ گئی ہے۔ برسلز منعقدہ یورپی یونین سربراہ کانفرنس کے موقع پر یونین اور یوکرائن کے درمیان قریبی تعاون کے علامتی اعتبار سے ایک نہایت اہم سمجھوتے پر دستخط ہوئے ہیں۔

تصویر میں بائیں جانب چھیاسی سالہ بابا گانیا ہیں۔ ان کے شوہر کی موت قریب ایک دہائی پہلے ہو چکی ہے۔ وہ پچیس برسوں سے چیرنوبل کے قریبی گاؤں میں مقیم ہیں اور اپنی ذہنی طور پر معذور بہن سونیا (تصویر میں دائیں) کی دیکھ بھال کر رہی ہیں۔ وہ فخر سے کہتی ہیں کہ انہیں تابکار مود سے خوف نہیں اور وہ مشروم کو اتنا ابالتی ہیں کہ اُن میں سے تابکاری اثر ختم ہو جاتا ہے۔ فوٹو گرفر علینا اُن سے کسی مرتبہ مل چکی ہیں۔

چھیاسی برس کی گانیا اپنی بہن سونیا کے ساتھ چیرنوبل شہر سے انیس کلومیٹر کی دوری پر واقع گاؤں کُوپُوویٹ میں مقیم ہیں۔ یہ گاؤں چیرنوبل جوہری مرکز کے کھنڈرات کے قریب ہے۔ اپریل سن 1986 میں جوہری مرکز کی تباہی کے بعد کُوپُوویٹ گاؤں کے سینکڑوں لوگ گھربار چھوڑ کر چلے گئے تھے۔ ان ویران مکانات میں سے ایک گانیا کا اسٹور ہے۔ اسی میں اُس نے اپنے تابوت رکھے ہوئے ہیں۔

فوٹوگرافو علینا روڈیا کے مطابق چیرنوبل ٹریجڈی کے بعد کُوپُوویٹ گاؤں کا قبرستان بھی یوکرائن کے دوسرے قبرستانوں جیسا ہو کر رہ گیا تھا۔ کُوپُوویٹ کے گرنے والے مکانات سے لوگوں کو نکال لیا گیا تھا اور وہ تابکاری زون سے باہر زندگی بسر کر رہے ہیں لیکن اُن کی واپسی مرنے کے بعد ہو گی جب اُن کی تدفین گاؤں کے قبرستان میں کی جائے گی۔

کُوپُوویٹ کے باسی اپنے مرے ہوئے اہل خانہ کی قبروں کی دیکھ بھال ضرور کرتے ہیں۔ انہی میں سے ایک بزرگ خاتون بابا مارؑوسیا ہے۔ وہ گاؤں اپنی والدہ کی قبر کو صاف کرنے آئی ہوئی تھیں کہ فوٹوگرافر علینا سے ملاقات ہوئی۔ مارُوسیا نے بتایا کہ اُس کی خواہش ہے کہ مرنے کے بعد اُسے شوہر کی قبر کے ساتھ نہیں بلکہ ماں کی قبر کے پہلو میں دفن کیا جائے۔ اُن کی ایک بیٹی یوکرائنی دارالحکومت کییف میں رہتی ہے۔

گالینا ایک دوسرے گاؤں ساموسیلی کی باسی ہیں اور وہ واپس لوٹ کر اپنے گاؤں میں پھر سے آباد ہو چکی ہیں۔ اُن کی عمر بیاسی برس کی ہے۔ وہ اُن چند افراد میں سے ہے، جو اب واپس آ چکے ہیں۔ گالینا اپنی پرانی یادوں کے حوالے سے کہتی ہیں کہ جوانی میں وہ دنیا بھر کی سیر کرنے کی تمنا رکھتی تھیں لیکن وہ زندگی میں کییف سے آگے نہیں جا سکی ہیں۔

ایوان ایوانووچ اور اُن کی بیوی ایسے چند سو لوگوں میں سے ہیں، جنہوں نے کُوپُوویٹ واپس آنے میں بہتری محسوس کی۔ وہ اسی کی دہائی میں تابکاری سے متاثرہ اس علاقے میں لوٹ آئے تھے۔ ایوان اس علاقے کا دورہ کرنے والوں کے لیے ایک اسٹار کی حیثیت اختیار کر چکا ہے۔ اُن کی اہلیہ چند برس قبل رحلت پا گئی تھیں۔ علینا جب بھی ایوان سے ملتی ہے، تو وہ اسے کئی واقعات سناتا ہے، جو حقیقت اور تصورات کی دنیا سے جڑی ہوتی ہیں۔

رواں برس چھبیس اپریل کو چیرنوبل حادثے کی بتسویں برسی منائی گئی۔ فوٹوگرافر علینا روڈیا کو ایک اور گاؤں اوپاچیچی جانے کا اتفاق ہوا۔ اس گاؤں میں اُس کی ملاقات ایک اور بڑھیا سے ہوئی۔ وہ اسی گاؤں میں برسوں سے مقیم ہے۔ اس گاؤں کے بیشتر لوگ اب مر چکے ہیں۔ کھلے خالی گھروں میں خطوط، تصاویر بکھری ہوئی ہیں۔ ان گھروں میں یوکرائنی کشیدہ کاری کے تولیے اور فرنیچر آنے والوں کو تکتے رہتے ہیں۔

مارُوسیا مسلسل اپنے شوہر ایوان کو دیکھتی رہتی ہے، جو اب شدید علیل ہو چکا ہے۔ اُس پر فالج کا حملہ ہوا اور اب وہ ڈیمینشیا کا مریض بن چکا ہے۔ ماروسیا کے مطابق وہ اکثر راتوں میں اٹھ کر باہر نکل کر اپنے ٹریکٹر کو تلاش کرتا ہے۔ ایوان بیالیس برس تک کام کرتا رہا ہے۔ بوڑھی مارُوسیا بھی اب اپنی سست روی سے آنے والی موت کی منتظر ہے اور وہ کہتی ہے کہ وہ اپنے بچوں پر بوجھ نہیں بننا چاہتی۔

مارُوسیا کے شوہر ایوان نے بیمار ہونے سے پہلے اپنے اور بیوی کے لیے دو تابوت مکمل کر کے رکھ چھوڑے ہیں۔ یہ دونوں تابوت اُن کے مکان کے ساتھ والے مکان میں رکھے ہوئے ہیں۔ مارُوسیا کے مطابق نیچے والا تابوت اُس کا ہے اور اوپر والا تابوت اُس کے شوہر ایوان کا ہے۔

علینا کے مطابق ساموسیلی گاؤں میں اب بھی چند ایسے لوگ آباد ہیں، جنہوں نے اس مقام پر زندگی بسر کرنے کا خود فیصلہ کیا تھا۔ علینا روڈیا بھی چیرنوبل کے قریبی علاقے میں پیدا ہوئی تھی اور وہ ان دیہات میں کئی مرتبہ آ چکی ہے اور ہر مرتبہ اُس پر اداسی پہلے کے مقابلے میں زیادہ طاری ہو جاتی ہے۔ سبھی لوگوں کی عمریں ستر برس سے زائد ہیں علینا جب بھی یہاں آتی ہے تو کسی نہ کسی کی موت واقع ہو چکی ہوتی ہے۔

اس نمائش میں جنگ میں استعمال کیے جانے والے ساز و سامان، زمینی فورسز کے لیے رابطے کے آلات، قانون نافذ کرنے والے اداروں کے لیے اسلحہ اور سرحدی حفاظت کے استعمال کی مصنوعات رکھی گئی ہیں۔

نمائش کی افتتاحی تقریب میں یوکرائن کے وزیر دفاع کے ہمراہ پاکستان کے وزیر برائے دفاعی پیداوار رانا تنویر بھی موجود تھے۔

پاکستان کے وزیر برائے دفاعی پیداوار رانا تنویر نے یوکرائن کے قومی سلامتی اور دفاعی کونسل کے پہلے ڈپٹی سکریٹری اولید گلاڈوفسکی سے ملاقات کی۔

ملاقات میں رانا تنویر نے کہا کہ گزشتہ بیس سال کے عرصے میں پاکستان اور یوکرائن کی دفاعی صنعت کے درمیان تعلقات میں بہتری ہوئی ہے۔ انہوں نے اس بات کا بھی اظہار کیا کہ دونوں ممالک میں دفاعی تعاون کے وسیع مواقع موجود ہیں۔

پاکستان کی جانب سے وزیر برائے دفاعی پیداوار کے وفد میں پاکستانی دفاعی برآمدات کے فروغ کی تنظیم ’پاکستان ڈیفنس ایکسپورٹ پرموشن آرگنائزیشن اور ہیوی انڈسٹری ٹیکسلا کے اراکین بھی شامل تھے۔

بین الاقوامی اسلحے اور سکیورٹی کی اس نمائش کے موقع پر یوکرائن میں پاکستان کے سفیر میجر جنرل (ر) اطہر عباس نے وزیرِ برائے دفاعی پیداوار رانا تنویر اور ان کے وفد کے ہمراہ پاکستانی پویلین کا دورہ کیا۔

ہیوی انڈسٹری ٹیکسلا نے الخالد ٹینک، ڈریگن فور ایکس فور بکتر بند اور دیگر بلٹ پروف گاڑیوں کے ماڈل نمائش میں پیش کیے۔

سنائپر بندوقیں، رائفلیں، پسٹل اور دیگر اسی قسم کی چھوٹے ہتھیار شرکاء کی توجہ کا مرکز رہے۔

یوکرائن کی وزارت داخلہ نے کہا ہے کہ اتوار کو دونیتسک کے علاقے سلوینسک میں یوکرائنی پولیس کا ایک اہلکار ہلاک ہو گیا۔ روس نواز جنگجوؤں نے وہاں ایک پولیس اسٹیشن پر حملہ کیا اور ایک سکیورٹی چیک پوائنٹ کو نذر آتش کر دیا گیا تھا۔ کییف حکومت نے اس علاقے میں ’انسداد دہشت گردی‘ کے لیے ایک آپریشن شروع کر دیا ہے۔

گزشتہ کچھ ہفتوں سے روس نواز جنگجو دونیتسک اور اس کے نواحی علاقوں میں متعدد حکومتی عمارتوں پر قبضہ کیے ہوئے ہیں۔ وہ اس علاقے کی آزادی کی خاطر ایک ریفرنڈم کا مطالبہ کر رہے ہیں۔ اس علاقے میں روسی نسل کے افراد کی اکثریت ہے۔

یوکرائن کی حکومت نے سلوینسک نامی علاقے میں بھی دہشت گردی کے خلاف خصوصی آپریشن شروع کرنے کا اعلان کیا ہے، جس سے بحران کی شدت کا اندازہ لگایا جا سکتا ہے۔ یوکرائن کے وزیر داخلہ Arsen Avakov نے اس آپریشن کے حوالے سے اپنے فیس بک پیغام میں لکھا ہے، ’خدا ہمارا حامی و ناصر ہو‘۔ مقامی آبادی کو شہر کا مرکزی علاقہ خالی کرنے یا گھروں میں رہنے کی تاکید کر دی گئی ہے۔

کییف حکومت کو اندیشہ ہے کہ روس بدامنی سے فائدہ اٹھاتے ہوئے یوکرائن کے مزید علاقوں پر قبضہ کر سکتا ہے۔ فروری میں کریمیا کے روس کے ساتھ الحاق کے بعد وہاں بحرانی صورتحال برقرار ہے۔ یوکرائن کے اس علاقے نے روس کے ساتھ الحاق کے لیے ایک ریفرنڈم کرایا تھا۔

مغربی دفاعی اتحاد نیٹو نے ایسی سیٹلائٹ تصاویر جاری کی ہیں، جن میں دیکھا جا سکتا ہے کہ روس نے یوکرائن کے ساتھ سرحدوں پر بڑے پیمانے پر فوجی تعینات کر رکھے ہیں۔ نیٹو کے مطابق وہاں روسی فوجیوں کی تعداد تقریباﹰ چالیس ہزار ہے۔ ناقدین کا کہنا ہے کہ روس اس منصوبہ بندی میں ہے کہ جیسے ہی کوئی موقع پیدا ہو، یوکرائن پر حملہ کر دیا جائے۔

روسی وزیر خارجہ سیرگئی لاوروف نے ایسے الزامات مسترد کر دیے ہیں کہ ماسکو حکومت یوکرائن پر حملے کی منصوبہ بندی کر رہی ہے۔ تاہم انہوں نے اصرار کیا کہ کریمیا کو یوکرائن کا حصہ تصور نہ کیا جائے۔

یوکرائن کے مشرقی علاقوں کی صورتحال کریمیا سے مختلف ہے۔ معائنہ کاروں کا کہنا ہے کہ ان علاقوں کی زیادہ تر آبادی یوکرائن کے ساتھ رہنا چاہتی ہے تاہم وہ وسیع تر خود مختاری کے خواہاں ضرور ہیں۔ صرف ایک اقلیت کی کوشش ہے کہ روس کے ساتھ الحاق کر لیا جائے۔

یوکرائن کے بحران پر ایک بین الاقوامی ہنگامی میٹنگ آئندہ جمعرات کو منعقد کی جا رہی ہے۔ اس دوران جرمن وزیر خارجہ فرانک والٹر اشٹائن مائر نے مطالبہ کیا ہے کہ روس تناؤ کے خاتمے کے لیے کوشش کرے۔ انہوں نے کہا کہ ماسکو حکومت یوکرائن کی مشرقی سرحدوں سے اپنی افواج واپس بلائے۔