اس وقت جرمنی کے دورے پر آئے ہوئے چین کے وزیر اعظم لی چیانگ نے جرمن چانسلر سے ملاقات دارالحکومت برلن میں ان کے دفتر میں منگل بیس جون کے روز کی۔ اس ملاقات کے بعد ایک مشترکہ پریس کانفرنس سے خطاب کرتے ہوئے چانسلر اولاف شولس نے کہا کہ چین کو روس کے یوکرین کے ساتھ تنازعے کے حل کے لیے ماسکو پر اپنا اثر و رسوخ استعمال کرنا چاہیے۔

چینی جرمن حکومتی مشاورت

چانسلر شولس کے دفتر میں دونوں رہنماؤں کی یہ ملاقات دراصل دونوں ممالک کے مابین حکومتی سطح پر ہونے والی مشاورت بھی تھی، جس میں برلن اور بیجنگ میں ملکی حکومتوں کے وفود بھی شریک ہوئے۔

جرمن حکوت کی چینی کمپنی کو ہیمبرگ بندرگاہ کے حصص خریدنے کی اجازت

اس مشترکہ حکومتی مشاورت کے بعد جب جرمن چانسلر چینی وزیر اعظم کے ساتھ مل کر صحافیوں سے گفتگو کر رہے تھے، تو اولاف شولس نے کہا کہ اقوام متحدہ کی سلامتی کونسل کے پانچ مستقل رکن ممالک میں سے ایک کے طور پر چین پر ایک 'بہت خاص ذمہ داری‘ بھی عائد ہوتی ہے۔

جرمن سربراہ حکومت نے کہا کہ یہ بات آئندہ بھی انتہائی اہمیت کی حامل رہے گی کہ چین، اپنے اب تک کے رویوں کے تسلسل میں، ماسکو کو کوئی ہتھیار مہیا نہ کرے۔

جوہری ہتھیاروں کی ’نہ دھمکیاں اور نہ ہی استعمال‘

پریس کانفرنس میں چانسلر شولس نے روس کے لیے 'جارحیت کرنے والے روس‘ کے الفاظ استعمال کرتے ہوئے گزشتہ برس نومبر میں کیے گئے اپنے اس دورہ چین کا حوالہ بھی دیا، جس میں انہوں نے چینی صدر شی جن پنگ پر واضح کر دیا تھا کہ (یوکرینی جنگ میں) ایٹمی ہتھیاروں کے استعمال کی کوئی دھمکی نہیں دی جانا چاہیے اور کسی بھی طرح کے جوہری ہتھیار تو ''یقینی طور پر کسی بھی حالت میں استعمال نہیں کیا جانا چاہییں۔‘‘

تائیوان کے اطراف میں چینی اقدامات سے کشیدگی میں اضافہ، جرمنی

اس تناظر میں جرمن چانسلر نے کہا، ''یہ موقف آج تک نہیں بدلا اور میں (چین کا) شکر گزار ہوں کہ اس بارے میں ہماری مشترکہ پوزیشن بہت واضح ہے۔‘‘

اس جرمن چینی حکومتی مشاورت کے دوران بھی یوکرین کی جنگ ایک اہم موضوع رہی۔ اسی لیے بعد میں پریس کانفرنس کے دوران چانسلر شولس نے یہ بات بھی زور دے کر کہی کہ یوکرین کی علاقائی وحدت، سلامتی اور خود مختاری کے حق کا بھی مکمل طور پر احترام کیا جانا چاہیے۔

چین نے روس کو ہتھیار دیے تو 'نتائج‘ نکلیں گے، جرمن چانسلر

’سامراجیت کسی مسئلے کا حل نہیں‘

اولاف شولس نے کہا، ''دنیا بھر میں پرامن بقائے باہمی کا اصول ایک ایسے بین الاقوامی نظام کی بنیاد پر ہی قائم ہے، جس میں یہ نہیں ہوتا کہ اس بقائے باہمی کا تعین کوئی بھی طاقت ور ریاست اپنی طاقت کے بل پر کرے۔‘‘

جرمن عوام میں سب سے زیادہ تشویش کی وجہ روس اور چین، سروے

چانسلر شولس نے چینی وزیر اعظم لی چیانگ کی موجودگی میں کہا کہ کسی بھی ملک کو دیگر ممالک کو اپنے ہی گھر کا عقبی حصہ نہیں سمجھنا چاہیے اور نہ ہی سرحدوں میں طاقت کے زور سے کسی رد و بدل کی کوشش کرنا چاہیے۔

جرمن چانسلر نے کھل کر کہا، ''سامراجیت اور سامراجی طرز عمل کبھی بھی کسی مسئلے کا حل نہیں ہوتے۔‘‘

م م / ش ر (ڈی پی اے، اے ایف پی)