اسپورٹس کے لیے ملبوسات تیار کرنے والی امریکہ کی معروف کمپنی نائیکی نے 23 جون جمعرات کے روز اعلان کیا کہ وہ روسی بازار اچھائی کے لیے چھوڑ رہا ہے اور اپنا کاروبار یہاں دوبارہ نہیں کھولے گا۔ کمپنی نے 24 فروری کو یوکرین پر حملے کے بعد ہی کئی دنوں تک کے لیے عارضی طور پر اپنی دکانیں بند کر دی تھیں۔

نائیکی نے اپنے اس اقدام کا اعلان ایک ایسے وقت کیا ہے، جب یوکرین میں جاری جنگ کی وجہ سے مغربی ممالک کی بہت سی کمپنیاں تیزی سے روس سے باہر نکل رہی ہیں۔

نائیکی نے روس میں اپنے کاروبار کے حوالے سے کیا کہا؟

کمپنی نے اپنی ایک ای میل میں روسی مارکیٹ چھوڑنے کے بارے میں تفصیل سے وجوہات بیان کی ہیں۔ اس نے لکھا، ''نائیکی نے روسی بازار چھوڑنے کا فیصلہ کر لیا ہے۔ ہماری ترجیح اس بات کو یقینی بنانا ہے کہ آئندہ مہینوں میں جب ہم اپنا کاروبار بند کر رہے ہوں گے، تو ہمیں اپنے ملازمین کی مکمل حمایت کا خیال رکھنا ہو گا۔'' 

کمپنی کا مزید کہنا تھا کہ وہ بہت ہی جلد روس میں اپنی ویب سائٹس اور ایپس تک رسائی کو بھی معطل کر دے گی۔

 نائیکی نے پہلے ہی روس میں عارضی طور پر اپنے کچھ اسٹورز بند کر دیے تھے اور اپنے روسی خوردہ فروشوں کے ساتھ لائسنس کے معاہدوں کی تجدید نہیں کی تھی۔ تاہم اس نے ملک سے با ضابطہ انخلا کا اعلان اب کیا ہے۔

خبر رساں ادارے روئٹرز کے مطابق  نائیکی کو روس سے اپنی آمدن کا ایک فیصد سے بھی کم حصہ ملتا ہے اور اس کے اس اقدام سے اس کے کاروبار پر محض جزوی اثرات ہی مرتب ہوں گے۔ تاہم کمپنی سماجی مسائل پر جو موقف اختیار کرتی رہی ہے، اس کو اب بھی بڑی اہمیت کی نظر سے دیکھا جاتا ہے۔

ماضی میں کمپنی نے امریکی فٹ بال کوارٹر بیک کولن کیپرنک کا سپورٹ کیا تھا اور امریکہ میں نسل پرستی کے خلاف احتجاج میں قومی ترانے کے دوران ان کے گھٹنے ٹیکنے کے فیصلے کی حمایت بھی کی تھی۔

کون سی دوسری کمپنیاں روس چھوڑ چکی ہیں؟

حالیہ مہینوں میں ٹیکنالوجی، تفریحی اور فنانس سے متعلق کئی مغربی کمپنیوں نے روس سے کنارہ کشی اختیار کرنے کا فیصلہ کیا ہے۔ میکڈونلڈز اور اسٹار بکس نے مارچ کے اوائل میں ہی روس میں اپنا آپریشن معطل کر دیا تھا، جبکہ ایمیزون نے بھی اسی ماہ میں روس اور بیلاروس کے ساتھ اپنا آپریشن بند کر دیا۔

ٹیلی مواصلات سے متعلق ساز و سامان تیار کرنے والی کمپنی سسکو نے بھی جمعرات کے روز ہی نائیکی کے طرز پر روس اور بیلاروس میں اپنا کاروبار سمیٹنے کا فیصلہ کر لیا ہے۔

غیر ملکی کمپنیوں کو ان ممکنہ نئے قوانین کے خطرے کے تحت روس سے تیزی سے نکلنے کی ترغیب دی جا رہی ہے کہ اس کے تحت ماسکو مستقبل میں ایسی کمپنیوں کے اثاثے ضبط کرنے اور ان کے خلاف مجرمانہ قسم کے جرمانے عائد کرنے کی اجازت دے سکتا ہے۔

ص ز/ ج ا (اے ایف پی، روئٹرز)