بیجنگ کے ڈیایوٹائی اسٹیٹ گیسٹ ہاؤس میں آج منگل 16 اپریل کو چینی صدر شی جن پنگ  کے ساتھ ملاقات کے بعد جرمن چانسلر اولاف شولس نے ایکس (سابقہ ٹوئٹر) پر تحریر کیا، ''چین کے الفاظ روس کے لیے اہمیت رکھتے ہیں۔‘‘

شولس نے مزید لکھا، ''اسی لیے میں صدر شی سے کہا کہ وہ روس پر اپنا اثر و رسوخ استعمال کریں تاکہ پوٹن اپنی بے معنی مہم کو ختم کریں، اپنے فوجیوں کو واپس بلائیں اور اس خوفناک جنگ کا خاتمہ کریں۔‘‘ ان کا یہ بھی کہنا تھا کہ چینی صدر نے یوکرین جنگ کے حوالے سے سوئٹزرلینڈ میں ایک امن کانفرنس کی حمایت پر اتفاق کیا ہے۔

یوکرین پر تھوپی جانے والی روسی جنگ کے حوالے سے چین کا مؤقف رہا ہے کہ وہ اس معاملے پر غیر جانب دار ہے، تاہم ماسکو کی مذمت نہ کرنے کے سبب چین تنقید کی زد میں بھی ہے۔

دوسری طرف چین اور روس حالیہ برسوں کے دوران معاشی تعاون اور سفارتی تعلقات میں اضافہ کر چکے ہیں۔ ان دونوں ممالک کی تزویراتی پارٹنرشپ یوکرین جنگ کے بعد مسلسل مضبوط سے مضبوط تر ہوتی جا رہی ہے۔

چانسلر کے دفتر سے جاری ہونے والی ریکارڈنگ کے مطابق شی جن پنگ کے ساتھ آج منگل کو ہونے والی ملاقات میں جرمن چانسلر اولاف شولس کا کہنا تھا، ''روس کی طرف سے یوکرین کے خلاف اشتعال انگیز جنگ اور روسی اسلحے میں اضافے سے یورپ میں سلامتی کے حوالے سے اہم منفی اثرات مرتب ہو رہے ہیں۔‘‘

شولس کا یہ بھی کہنا تھا، ''یہ ہمارے بنیادی مفادات کو براہ راست متاثر کر رہے ہیں۔‘‘ اور یہ کہ ایسے اقدامات سے چونکہ اقوام متحدہ کے چارٹر کے اصولوں کی خلاف ورزی ہوتی ہے تو اسی سبب یہ پوری دنیا کے استحکام کو نقصان پہنچا رہے ہیں۔

جرمن چانسلر اولاف شولس اتوار 14 اپریل کو چین پہنچے تھے۔ ان کے ساتھ اس دورے میں وزراء اور کاروباری افراد کا ایک بڑا وفد چین گیا ہے۔ شولس کی طرف سے چانسلر کا عہدہ سنبھالنے کے بعد سے چین کا یہ دوسرا دورہ ہے۔

ا ب ا/ا ا (اے ایف پی)