یوگنڈا کا شمار براعظم افریقہ کے ان ممالک میں ہوتا ہے، جہاں سیاسی استحکام پایا جاتا ہے۔ بڑے پیمانے پر بدعنوانی کے باوجود اس ملک میں اقتصادی ترقی کی رفتار مسلسل پانچ سے سات فیصد تک جا رہی ہے۔ ساتھ ہی صومالیہ میں تعینات امن دستوں میں سب سے زیادہ فوجی بھی یوگنڈا کے ہی ہیں۔ مشہور برطانوی سیاستدان ونسٹن چرچل نے یوگنڈا کو افریقہ کا موتی قرار دیا تھا۔ لیکن اب یہ موتی اپنی چمک دمک کھو چکا ہے۔ عیدی امین اور ملٹن اوبوٹے کے ظالمانہ اَدوارکے بعد اب یوری موسوینی 26 برسوں سے حکومت سے چپکے ہوئے ہیں۔

یوگنڈا کے دارالحکومت کمپالا میں جرمنی کی فریڈرش ایبرٹ فاؤنڈیشن کی سارا ٹانگن اس ساری سیاسی صورتحال پر شکوک و شبہات کا اظہار کرتی ہیں۔ وہ کہتی ہیں کہ یہ سمجھنا ضروری ہے کہ یوگنڈا کا سیاسی نظام جمہوری نہیں ہے بلکہ اس ملک میں آمرانہ جمہوریت ہے۔ پولیس اور فوج عوام کی بھلائی کے لیے نہیں بلکہ حکومت کے لیے کام کرتے ہیں۔ سارا ٹانگن کے بقول یہ ادارے انتہائی بدعنوان ہیں اور عوام ان سے شدید نالاں بھی ہیں۔ اس کے علاوہ ایسی کئی نیم فوجی تنظیمیں ہیں، جو کسی قانون کو تسلیم نہیں کرتیں۔

یوگنڈا میں گزشتہ برس ہونے والے انتخابات کے بارے میں بین الاقوامی مبصرین کا کہنا تھا کہ انتخابی عمل آزاد تو ضرور تھا مگر شفاف نہیں تھا۔ حکومتی جماعت این آر ایم نے انتخابی مہم سرکاری خزانے سے چلائی تھی۔

یوری موسوینی نے 1986ء میں حلف برداری کے دوران کہا تھا کہ افریقہ کا مسئلہ یہ ہے کہ یہاں حکمران طویل عرصے تک اقتدار میں رہتے ہیں اور اس دوران بدعنوانی، لاقانونیت اور اقربا پروری پروان چڑھتی ہے۔ اُس موقع پر جب ایک صحافی نے ان سے سوال کیا کہ کیا وہ بھی ایسا ہی کریں گے؟ تو اس پر موسوینی نے جامع انداز میں جواب دیا۔ ’’بات جدوجہد کی ہے۔ میں1971ء سے جنگ لڑ رہا ہوں۔ میں سولہ سال سے لڑ رہا ہوں، آپ مجھ سے کیا امید کر رہے ہیں کہ میں اپنی جدوجہد درمیان میں ہی ختم کر دوں۔ ہم اب جنگلوں میں نہیں بلکہ حکومت میں لڑ رہے ہیں۔ میں اقتدار کی نہیں بلکہ جدوجہد کی بات کر رہا ہوں‘‘۔

سیاسی ماہرین کہتے ہیں کہ گزشتہ پچاس برسوں کے دوران یوگنڈا میں کبھی بھی ایسا نہیں ہوا کہ انتقال اقتدار پرامن انداز میں پایہ تکمیل تک پہنچا ہو۔ یوگنڈا کی زیادہ تر آبادی بیس سال سے کم عمر کی ہے۔ ان نوجوانوں نے یوری موسوینی کے علاوہ ابھی تک کسی اور کو صدر کے طور پر دیکھا ہی نہیں ہے۔ اب نوجوان نسل اپنے جمہوری حقوق کا مطالبہ کر رہی ہے۔ نوجوان رکن اسمبلی حکومت پر تنقید بھی کر رہے ہیں اور یہی لوگ افریقہ کے اس موتی کے لیے امید کی کرن بھی ہیں۔

A.Schmidt / ai / aa