محققین انہیں ''سنہرے بالوں والے امریکن‘‘ کہتے ہیں۔  روشن آنکھوں والے یہ ماحولیاتی ماہرین متحدہ عرب امارات کی حمایت اور اس کی سربراہی میں موسمیاتی تبدیلیوں سے متعلق اقوام متحدہ کے  آئندہ سربراہی اجلاس یا ''کاپ ٹوئنٹی ایٹ‘‘  کے لیے جذباتی انداز میں ٹویٹس کر رہے ہیں۔ مسئلہ صرف ایک ہے؟ وہ حقیقی انسان نہیں۔ بین، بریانا، ایما، کیٹلین اور کول نے موسمیاتی تبدیلیوں  کو حق میں مہم کو فروغ دینے کے لیے یو اے ای کے ساتھ ساتھ کاپ ٹوئنٹی ایٹ کے منتظم  اور تیل کی ریاستی کمپنی کے سربراہ سلطان الجابر کے کردار کے بارے میں زبردست حوصلہ افزا ٹویٹس کیں۔

فیس بک اور ٹوئٹر پر ہزاروں جعلی، ایران نواز اکاؤنٹس کا خاتمہ

ان ٹوئٹر صارفین کے پُرجوش پروفائل شاٹس کسی خیالی ناول کی ڈرائنگ کی طرح نظر آتے ہیں۔ یہ بظاہر مصنوعی ذہانت یا  اے آئی کے تحت تصویریں بنانے والے ایک سافٹ وئیر  کا استعمال کرتے ہوئے بنائے گئے ہیں۔ ان کے نام، مقامات اور ماحولیاتی اسناد آن لائن کہیں بھی ایک ساتھ نظر نہیں آتے۔ اے ایف پی کے تجزیہ کاروں نے ان اور دیگر درجنوں ٹوئٹر اکاؤنٹس کی نشاندہی کی کہ وہ آن لائن ایک مربوط سرگرمی میں ملوث ہیں، جسے عوامی رائے کو متاثر کرنے کے لیے نچلی سطح پر ایک جھوٹی مہم یا 'آسٹروٹرفنگ‘ کہا جاتا ہے۔

فیس بک نے درجنوں روسی جعلی اکاؤنٹس بند کر دیے

مثال کے طور پر  غیر سرکاری گروپوں کے اتحاد کلائمیٹ ایکشن اگینسٹ ڈس انفارمیشن (CAAD) کے ڈیجیٹل تجزیے کے مطابق، ''سنہرے بالوں والے‘‘  یہ اکاؤنٹس اگست 2022 میں ایک دوسرے سے صرف چند گھنٹوں کے وقفے کے اندر بنائے گئے تھے۔ کیڈ کے مطابق ان اکاؤنٹس نے تقریباﹰ ایک ہی وقت میں اسی طرح کے پیغامات کا مجموعے شائع کیے ہیں، جنہیں  واشنگٹن میں متحدہ عرب امارات کے سفارت خانے نے ری ٹویٹ کیا۔

فیس بک اور ٹوئٹر نے سینکڑوں فرضی اکاؤنٹس بند کر دیے

کاپ ٹوئنٹی ایٹ  کے ایک ترجمان نے ایک ای میل میں اے ایف پی کو بتایا کہ یہ اکاؤنٹس ''بیرونی عناصر  کے ذریعہ تیار کیے گئے تھے جو نامعلوم اورکاپ ٹوئنٹی سے غیر منسلک‘‘ تھے اور واضح طور پر کاپ ٹوئنٹی  اور ماحولیاتی تبدیلیوں کے عمل کو بدنام کرنے کے لیے بنائے گئے تھے۔ ان کا کہنا تھا کہ کا پ ٹوئنٹی ایٹ  نے مشتبہ اکاؤنٹس کی جانب سے سرگرمی کی اطلاع ٹوئٹر انتظامیہ کو دی تھی اور پلیٹ فارم سے کہا تھا کہ وہ ''ان سرگرمیوں کو روکنے کے لیے فوری کارروائی‘‘ کرے۔

محققین کی طرف سے نشاندہی کے بعد ٹوئٹر پر بہت سے اکاؤنٹس کو معطل کر دیا گیا تھا۔ مئی میں امریکی اور یورپی یونین کے قانون سازوں نے جابر سے مستعفی ہونے کا مطالبہ کرتے ہوئے کہا کہ یواے ای کی سرکاری تیل کی کمپنی  کے سربراہ کے طور پر ان کے عہدہ کاپ ٹوئنٹی ایٹ میں ان کی ذمہ داریوں سے متصادم ہے۔  جابر کو کاپ میں شامل امریکی مندوب جان کیری سمیت  دیگر فریقین کی حمایت بھی حاصل ہے ۔

انہوں نے قابل تجدید توانائی کی تیز رفتار ترقی پر زور دیا ہے اور گزشتہ ہفتے تسلیم کیا ہے کہ فوسل فیول میں بتدریج کمی ناگزیر ہے۔

ڈیجیٹل ڈس انفارمیشن سے متعلق ایک تجزیہ کار مارک اوون جونز نے اے ایف پی کے ساتھ 93 ایسے اکاؤنٹس کی ایک فہرست شیئر کی، جو ان کے بقول ''آسٹروٹرفنگ‘‘ کی کوششوں میں ملوث ہیں۔ ان میں سے چند تقریباﹰ دو سال پہلے بنائے گئے تھے۔ اس تجزیہ کار کے مطابق ان تمام اکاؤنٹس نے بڑے پیمانے پر یو اے ای کے کاپ ٹوئنٹی ایٹ سے متعلق ٹوئٹر اکاؤنٹ کو فروغ دینے پر توجہ مرکوز رکھی۔ اوون کے مطابق، ''عام طور پر ان کارروائیوں کے پیچھے کوئی  پی آر کمپنی ہوتی ہے۔‘‘

ش ر ⁄ ا ا (اے ایف پی)