نیوزی لینڈ کو بھاری مارجن سے شکست دینے کے بعد افغانستان کی کرکٹ ٹیم کے کپتان راشد خان نے کہا، ''یہ جیت نیوزی لینڈ جیسی بڑی ٹیم کے خلاف افغانستان کی بہترین کارکردگی ہے۔ افغانستان کے لیے ایک زبردست جیت ہے۔ اس ٹیم کی قیادت کرنا اور نیوزی لینڈ جیسی ٹیم کے خلاف جیتنا بہت اچھا احساس ہے۔‘‘

نیوزی لینڈ کے کپتان کین ولیمسن نے اعتراف کیا کہ ان کی ٹیم کی کارکردگی مایوس کن تھی۔ انہوں نے خاص طور پر پہلے دس اوورز میں  ناقص فیلڈنگ پر افسوس کا اظہار کیا۔

کیوی کپتان ولیمسن کا کہنا تھا، ''افغانستان نے کھیل کے تمام پہلوؤں میں ہمیں آسانی سے پیچھے چھوڑ دیا۔‘‘

میچ کا احوال

گیانا میں کھیلے گئے اس میچ میں افغانستان نے پہلے بیٹنگ کی۔ اوپنر بلے بازوں رحمان اللہ گرباز اور ابراہیم زردان نے نسبتا‌ مشکل پچ پر 103 رنز کی شراکت داری کی۔

گرباز نے 56 گیندوں پر 80 اور زردان نے 41 گیندوں پر 44 رنز بنائے۔ اس کے بعد نیوزی لینڈ نے آخری چھ اوورز میں مسلسل وکٹیں حاصل کر کے افغانستان کا سکور محدود کرنے کی کوشش کی۔

مقررہ بیس اوورز میں افغانستان کی ٹیم نے چھ وکٹوں نے نقصان پر 159 رنز بنائے۔ ایک اتفاق یہ بھی ہے کہ پاکستانی کرکٹ ٹیم نے بھی امریکہ کے خلاف پہلے کھیلتے ہوئے 159 رنز ہی بنائے تھے، اگرچہ ڈیلس کی پچ گیانا کی نسبت بیٹنگ کے لیے زیادہ ساز گار تھی۔

افغانستان کی بہترین باؤلنگ

نیوزی لینڈ کی ٹیم 160 رنز کا ہدف حاصل کرنے کے لیے میدان میں اتری تو فضل حق فاروقی کی پہلی ہی گیند پر اسے فن ایلن کی وکٹ کی صورت میں پہلا نقصان ہوا۔

افغانستان کے سبھی باؤلرز نے نیوزی لینڈ کو کسی بھی موقع پر سنبھلنے کا موقع نہیں دیا۔ پہلے دس اوورز میں ہی نیوزی لینڈ کے سات کھلاڑی پویلین لوٹ چکے تھے۔

فضل حق فاروقی نے تین اوورز اور دو گیندوں پر صرف 17 رنز دے کر چار کھلاڑیوں کو آؤٹ کیا۔ فاروقی نے گزشتہ میچ میں بھی پانچ وکٹیں حاصل کی تھیں۔

افغانستان کے کپتان راشد خان کی باؤلنگ کا جادو بھی سر چڑھ کو بولا۔ انہوں نے 17 رنز دے کر چار کھلاڑیوں کو آؤٹ کیا۔

نیوزی لینڈ کے لیے مشکل راہ

نیوزی لینڈ کے لیے اب ٹورنامنٹ کے اگلے مرحلے کے لیے کوالیفائی کرنا بہت مشکل ثابت ہو سکتا ہے۔ افغانستان کے ہاتھوں بڑے مارجن سے شکست کے بعد ٹیم کا رن ریٹ منفی چار سے بھی کم رہ چکا ہے۔

اب کیوی ٹیم کو اگلا میچ شریک میزبان ویسٹ انڈیز کے خلاف کھیلنا ہے۔ شکست کی صورت میں اگلے مرحلے تک رسائی کے امکانات تقریبا ختم ہو سکتے ہیں۔

ورلڈ کپ میں 'پہلی جیتوں کی بہاریں‘

عالمی ٹی ٹوئنٹی مقابلوں کے ابتدائی گروپ میچوں میں اب تک کئی ٹیمیں ریکارڈ بنا چکی ہیں۔

امریکہ نے پہلی مرتبہ پاکستان کو شکست دے دوچار کیا۔

افغانستان نے بھی نیوزی لینڈ کے خلاف پہلی بار کامیابی حاصل کی۔ کینیڈا اور یوگنڈا کی ٹیموں نے بھی پہلی جیت اپنے نام کی۔ بنگلہ دیش نے ورلڈ کپ مقابلے میں پہلی مرتبہ سری لنکا کو شکست دی۔