غیر سرکاری فلاحی تنظیم ایدھی فاؤنڈیشن کے مطابق شہر کی مساجد میں معمول سے دوگنی لاشیں بھیجی گئی ہیں۔ ان میں سے زیادہ تر کی موت اُن کے رشتہ داروں کے مطابق لُو لگنے سے ہوئی ہے۔ تاہم سندھ کی صوبائی حکومت کا موقف ہے کہ لُو لگنے سے اب تک صرف ایک ہلاکت ہوئی ہے۔

مسلمانوں کے مقدس مہینے رمضان کے آغاز ہی سے کراچی میں موسم شدید گرم ہو گیا تھا۔ اس تصویر میں کراچی کے ایک علاقے کے رہائشی بجلی کی لوڈ شیڈنگ اور گرمی سے بچنے کے لیے فٹ پاتھ پر سو رہے ہیں۔

پاکستان میں محکمہ موسمیات کی پیش گوئی کہ مطابق اگلے دو سے تین روز تک گرمی کی یہ شدت برقرار رہے گی اور درجہ حرارت چوالیس ڈگری تک پہنچ جائے گا۔ اس تصویر میں مرد اور بچے کراچی میں لیک ہوئے ایک پائپ کے پانی سے خود کو بھگو رہے ہیں تاکہ گرمی کی شدت کو کم کیا جا سکے۔

پاکستان میں صوبہ سندھ کے دارالحکومت کراچی کے باسیوں کو اکثر و بیشتر بجلی کی بندش کا سامنا رہتا ہے اور یہاں سرسبز علاقے بھی بہت کم ہیں۔ زیر نظر تصویر ایک مسافر کی ہے جو گرمی سے نڈھال اپنے چہرے کو بھگو کر ٹھنڈا کرنے کی کوشش کر رہا ہے۔

کراچی کی رش سے بھر پور گلیوں اور فٹ پاتھوں پر رہنے والے افراد کی رسائی پینے کے صاف پانی اور شیلٹر تک بہت کم ہوتی ہے۔ یہی وجہ ہے کہ یہ محروم لوگ موسم کی شدت سے براہ راست متاثر ہوتے ہیں۔

اس تصویر میں دیکھا جا سکتا ہے کہ کراچی میں ایک خاتون اپنے بچے کے سر پر رومال ڈال کر اسے سورج سے بچانے کی کوشش کر رہی ہے۔ جون سن 2015 میں کراچی کے قریب بارہ سو شہری لُو لگنے سے ہلاک ہو گئے تھے۔ ان میں سے زیادہ تر بے گھر افراد تھے۔

کراچی میں ایک سوشل ویلفئیر تنظیم کی جانب سے لگائے گئے ایک سٹال پر ایک بچہ ٹھنڈے پانی کی پھوار سے لطف اندوز ہو رہا ہے۔ گرمی کی شدت نے بچوں اور بوڑھوں سمیت سب ہی کو بے حال کر رکھا ہے۔

کراچی کے لوگوں کے لیے پھٹے ہوئے پانی کے پائپ آج کل کسی نعمت سے کم نہیں۔ یہاں بھی ایک ایسے ہی پائپ سے پھوٹتے پانی کے فوارے سے ارد گرد رہنے والے افراد خود کو تسکین پہنچا رہے ہیں۔

شدید گرمیاں جسم میں پانی کی کمی یا ڈی ہائیڈریشن کا خطرہ بڑھا دیتی ہیں۔ تپش کے باعث زیادہ پسینہ آنے سے جسم میں پانی کی کمی ہو جاتی ہے۔ ایسے میں خون گاڑھا ہو جاتا ہے جس کی وجہ سے صحت کے حوالے سے کئی مسائل جنم لیتے ہیں ۔ لہٰذا یقینی بنائیں کہ خصوصاﹰ دن میں بچے زیادہ سے زیادہ پانی پیتے رہیں۔

انسانی جسم 37 ڈگری سینٹی گریڈ تک درجہ حرارت برداشت کرنے کے قابل ہوتا ہے۔ درجہ حرارت اس سے زیادہ ہوجانے سے سر درد، تھکاوٹ، سستی، بھوک کی کمی، بدن میں درد، قے، پیٹ میں درد، جلن، اسہال، چکر آنا اور ساتھ ہی ذہنی توازن بگڑنے جیسے حالات پیدا ہو سکتے ہیں۔ اس لیے اس موسم میں جسم کی حرارت کو کنٹرول رکھنے کی کوششیں کرنی چاہیے۔

گرمیوں میں بچوں کو جتنا ممکن ہو، کولڈ ڈرنگ سے دور رکھا جائے۔گنے کا جوس زیادہ سے زیادہ پلایا جائے اور دہی میں گُڑ ملا کر کھانے کو دیا جائے۔گرمیوں میں فوڈ پوائزنگ کا خطرہ زیادہ بڑھ جاتا ہے۔ اس سے بچنے کے لیے پہلے سے کٹے ہوئے پھل کھانے اور دیر سے کھانا کھانے سے اجتناب ضروری ہے۔

بازار میں کھل عام ملنے والے فرائی یا تلے ہوئے کھانے اس موسم میں صحت پر خطرناک اثرات مرتب کرتے ہیں۔ اسی طرح بازاروں میں پھلوں سے نکالے گئے جوس جو بغیر کسی پیکنگ فروخت کیے جاتے ہیں، وہ بھی مہلک ثابت ہو سکتے ہیں۔

کوشش کیجیے کہ بچوں کو اس موسم میں کھلے کپڑے پہنائے جائیں۔ چست لباس پہنانے سے اجتناب کریں تاکہ ہوا کپڑوں سے گزر کر بدن کو ہوا لگ سکے۔ بہتر ہے کہ پولی ایسٹر اور مصنوعی ریشوں سے بنے لباس کے بجائے سوتی لباس خود بھی زیب تن کریں اور بچوں کو بھی استعمال کروائیں۔

بچوں کے دھوپ میں جانے سے پہلے یقینی بنائیں کہ ان کا جسم ڈھکا ہوا ہو۔ تیز یا گہرے رنگ کے کپڑے بچوں کو ہرگز نہ پہنائیں۔ ہلکے رنگوں کے کپڑے مثلاﹰ سفید رنگ کا استعمال اس موسم میں زیادہ مناسب ہے۔

بچوں کو اسکول سے لاتے ہوئے سب سے پہلے ان کے سر پر پانی میں بھیگا ہوا چھوٹا تولیہ رکھیں تاکہ ان کے جسم کا درجہ حرارت نہ بڑھے۔ ساتھ ہی چھتری کا استعمال بھی کریں تاکہ ان پر دھوپ براہ راست اثر نہ کرے۔

بچوں کو گھر سے خالی پیٹ نہ باہر نکلنے دیں۔ یقینی بنائیں کہ باہر جانے سے قبل بچہ نہ صرف پانی پی کر نکلے بلکہ ان کو ٹھنڈے پانی کی بوتل ساتھ بھی لے جانے کے لیے دیجیے۔ تاہم ایک بات کا دیہان ضرور رہے، بچہ اگر شدید پیسینے میں بھیگا ہوا ہے تو اسے فوری طور پر ٹھنڈا پانی نہ پینے دیا جائے بلکہ سادہ پانی کا استعمال کروایا جائے۔ اس کے علاوہ لسی کا استعمال بھی زیادہ سے زیادہ کروائیں۔

بچوں کے پیشاب کی رنگت پر نظر رکھنا بھی ضروری ہے۔ زرد رنگ پیشاب جسم میں ناکافی پانی کی مقدار کی علامت ہے۔ ایسے میں نہ صرف زیادہ پانی کا استعمال کروائیں بلکہ ضرورت پڑے تو ڈاکٹر سے بھی رجوع کریں۔