ورلڈ وائیڈ ویب کا آغاز ہوا کیسے؟

سوئٹزرلینڈ میں قائم نیوکلیئر تحقیق کے ادارے سرن میں کام کرنے والے برطانوی ماہر طبیعات برنرز لی اس ریسرچ سینٹر کے مختلف اداروں اور پراجیکٹس کے درمیان رابطہ کاری سے ناخوش تھے۔ اس مسئلے کے حل کے لیے انہوں نے اپنے خیال کو ایک مختصر تحریری متن کے طور پر اپنے شعبہ کے سربراہ کو پیش کیا جنہوں نے اسے ’غیر واضح مگر دلچسپ‘ قرار دیا۔

بظاہر اس غیر واضح خیال کی تکمیل کے لیے برنرز لی نے کام جاری رکھا اور بتدریج وہ تمام ضروری طریقہ کار تشکیل پانے لگے جو سب مل کر ورلڈ وائیڈ ویب کی شکل میں سامنے آئے۔ ان میں ویب ایڈریس کے لیے یو آر ایل تیار کی گئیں، پیجز اور اولین ویب براؤزر کی تیاری کے لیے HTML بنائی گئی۔

اس تمام کام کا نتیجہ 30 اپریل 1993ء کو عوامی طور پر سامنے آیا اور سرن کے ماہرین نے ورلڈ وائیڈ ویب کو لانچ کیا جو انٹرنیٹ کی دنیا میں ایک نئے انقلاب کو نقطہ آغاز ثابت ہوا۔

یہاں یہ بات سمجھنا ضروری ہے کہ ورلڈ وائیڈ ویب انٹرنیٹ نہیں ہے بلکہ یہ انٹرنیٹ کے ذریعے استعمال ہونے والی ایک آن لائن ایپلیکشن ہے۔ انٹرنیٹ اصل میں 1960ء کی دہائی سے ترقی کی منازل طے کر رہا تھا۔

دنیا کا اولین ورلڈ وائیڈ ویب پیج اور برنرز لی

30 برس قبل برنرز لی نے جو اولین ویب سائٹ لانچ کی وہ آج بھی آن لائن موجود ہے۔ اس ویب سائٹ کا ایڈریس ہے: http://info.cern.ch/hypertext/WWW/TheProject.html

اس لنک کے ذریعے آپ ماضی میں سفر کر سکتے ہیں اور اس عوامی سطح پر دستیاب اس اولین ویب سائٹ پر موجود ایک لنک کے ذریعے آپ ان سب افراد کے بارے میں بھی معلومات حاصل کر سکتے ہیں جو اس پراجیکٹ کا حصہ تھے۔ اس ویب سائٹ پر برنرز لی سے اس وقت رابطے کی معلومات بھی موجود ہے۔

جب یہ ویب سائٹ لانچ کی گئی اس وقت برنرز لی کا ٹیلی فون ایکسٹنشن 3755 تھا اور ان کا ای میل ایڈریس تھا  timbl@info.cern.ch۔

تاہم اس وقت برنرز لی امریکہ کے میساچیوسیٹس انسٹیٹیوٹ آف ٹیکنالوجی (ایم آئی ٹی) میں پروفیسر ہیں۔ اس وقت سے اب تک وہ ورلڈ وائیڈ ویب کنسورشیم کے سربراہ بھی ہیں جسے ورلڈ وائیڈ ویب کے حوالے سے ٹیکنیکس کو اسٹینڈرائیڈ کرنے کے لیے قائم کیا گیا۔

میشا ایرہارٹ (ا ب ا / ع ت)